भदौ ५, २०८२।
काठमाडौं – काठमाडौंमा सुरु भएको नाडा अटो शो–२०८२ मा पहिलो पटक ‘उड्ने ट्याक्सी’ प्रदर्शनीमा राखिएको छ। चिनियाँ कम्पनी चांगान–इहाङले उत्पादन गरेको ‘दीपल फ्लाइङ ट्याक्सी’ ले मेलामा उपस्थित प्रधानमन्त्री केपी शर्मा ओलीसहित युवाहरूको ध्यान खिचेको हो।
यसलाई नेपालका लागि नयाँ युगको मोबिलिटीको संकेतका रूपमा लिइएको छ। दुर्गम भूभागमा यातायात सजिलो बनाउन, पर्यटकीय अवलोकन तथा आपतकालीन सेवामा यसको उपयोग हुने अपेक्षा गरिएको छ।
यो दुई सिटको पूर्ण स्वचालित हवाई कार हो जसले अधिकतम ६०० किलो भार बोक्न सक्छ र करिब २५ मिनेटसम्म उड्न सक्छ। हाल प्रदर्शनका लागि मात्र ल्याइएको यो ट्याक्सी नेपालमा बिक्री खुला भएको छैन।
यसको मूल्य करिब ८ करोड रुपैयाँ पर्ने अनुमान छ। नेपालमा प्रयोग गर्नुअघि चार्जिङ स्टेसन, एयर करिडोर, ट्राफिक व्यवस्थापन प्रणाली र कानुनी पूर्वाधार आवश्यक पर्ने विशेषज्ञहरूको भनाइ छ।
‘उड्ने ट्याक्सी’ ले नेपाली युवामा उत्साह जगाएको छ र भविष्यमा नेपालमा वैकल्पिक यातायातका रूपमा प्रयोग हुने सम्भावना देखाइएको छ।
Related posts:
