साउन २५,२०८२।
काठमाडौं – अष्ट्रेलियामा यही अगस्ट १४ देखि २४ सम्म हुने टप एण्ड टी-२० क्रिकेट सिरिजमा सहभागी हुन नेपाली राष्ट्रिय क्रिकेट टोली आज काठमाडौंबाट प्रस्थान गरेको छ। नेपाल क्रिकेट संघ (क्यान)ले आइतबार एक विशेष कार्यक्रममा टोलीलाई औपचारिक बिदाइ गर्यो। कार्यक्रममा राष्ट्रिय खेलकुद परिषद्का सदस्य–सचिव टंकलाल घिसिङ, क्यान अध्यक्ष चतुरबहादुर चन्द र सचिव पारस खड्कालगायत उपस्थित थिए।
यस पटकको टप एण्ड टी-२० सिरिजमा नेपालसहित ११ टिम सहभागी छन्। नेपालले लिग चरणमा ६ खेल खेल्नेछ, जसअन्तर्गत पहिलो खेल १५ अगस्टमा स्थानीय नर्दर्न टेरिटोरी स्ट्राइकविरुद्ध हुनेछ।
दोस्रो खेल १६ अगस्टमा बंगलादेश ‘ए’सँग, तेस्रो खेल १८ अगस्टमा मेलबर्न स्टार्ससँग, चौथो खेल १९ अगस्टमा होबार्ट हुरिकेन्ससँग, पाँचौं खेल २० अगस्टमा मेलबर्न रेनेगेड्ससँग र अन्तिम लिग खेल २२ अगस्टमा पाकिस्तान शाहीन्ससँग हुनेछ।
रोहित पौडेल (कप्तान), दीपेन्द्र सिंह ऐरी (उपकप्तान), सन्दीप लामिछाने, कुशल भुर्तेल, आसिफ सेख, कुशल मल्ल, गुलशन झा, आरिफ सेख, भीम सार्की, रुपेश कुमार सिंह, सोमपाल कामी, नन्दन कुमार यादव, करण केसी, रिजन ढकाल, लोकेश बम, शाहब आलम।
प्रतियोगितामा पाकिस्तान शाहीन्स (पाकिस्तान ‘ए’), बंगलादेश ‘ए’, अमेरिकाबाट शिकागो किङ्समेन, अष्ट्रेलियाका बिग ब्यास एकेडेमी टोलीहरू होबार्ट हुरिकेन्स, पर्थ स्कोर्चर्स, एडिलेड स्ट्राइकर्स, मेलबर्न स्टार्स, मेलबर्न रेनेगेड्स र एसीटी कोमेट्स र एनटी स्ट्राइक सहभागी छन्। लिग चरणपछि शीर्ष ४ टिमले सेमिफाइनल खेल्नेछ र त्यसपछि फाइनल हुनेछ।
यो सिरिज नेपालका लागि आगामी अक्टोबरमा हुने आईसीसी टी–२० विश्वकप एसिया तथा इस्ट एसिया प्यासिफिक छनोटको तयारीको अवसरका रूपमा रहनेछ। साथै, नेपालले आगामी सेप्टेम्बरमा वेस्ट इन्डिजसँग ऐतिहासिक टी–२०आई श्रृंखला पनि खेल्ने तयारीमा छ।
Related posts:
