एमाले महाधिवेशनअघि ओली–पोखरेल खुला प्रतिस्पर्धामा

मंसिर ५, २०८२।   काठमाडौं दैनिक संवाददाता

काठमाडौ – नेकपा एमालेको एघारौँ महाधिवेशन नजिकिँदै गर्दा अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलबीच खुला प्रतिस्पर्धा अनिवार्य जस्तै बनेको छ। शुक्रबार च्यासलमा आठ घण्टा चलेको सचिवालय बैठकपछि दुवै नेताले आफू–आफ्ना अडान कडा रूपमा प्रस्तुत गरेपछि सर्वसम्मत नेतृत्व चयनको सम्भावना समाप्तप्रायः भएको देखिएको छ।

बैठकमा ओलीले फेरि पनि अध्यक्ष नछाड्ने अडान दोहोर्याउँदै पार्टीलाई जुझारु बनाउन “मिलिटेन्सी” आवश्यक रहेको टिप्पणी गरे। उनले प्रतिस्पर्धा रोकिँदैन भन्दै स्पष्ट संकेत दिदै  सहमति हुँदैन भने प्रतिस्पर्धालाई कसले रोक्न सक्छ र?

उता पोखरेलले भने आन्तरिक प्रतिस्पर्धाले नै संगठन बलियो हुने तर्क प्रस्तुत गर्दै आफू अध्यक्षका लागि प्रतिस्पर्धामा उत्रिने औपचारिक घोषणा गरे। म अध्यक्षका निम्ति डिजर्भ गर्छु, परिणाम स्वीकार्छु, भन्दै उनले ओलीका कमजोरीहरू पनि बैठकमै औँल्याए।

अध्यक्ष ओलीलाई साथ दिनेगरी महासचिव शंकर पोखरेल, उपमहासचिव प्रदीप ज्ञवाली, पृथ्वीसुब्बा गुरुङलगायतले धारणा राखे भने अर्कोतर्फ उपाध्यक्ष युवराज ज्ञवाली, अष्टलक्ष्मी शाक्य, विष्णुप्रसाद पौडेल, सचिव गोकर्ण विष्ट, योगेश भट्टराई, रघुवीर महासेठलगायत नेताहरू पोखरेलतर्फ उभिए।

बैठकका अन्य एजेण्डा, मधेश प्रदेश सरकारको संकट, राष्ट्रिय स्वयंसेवक फोर्स, वर्तमान राजनीतिक अवस्था उपाध्यक्ष तथा सचिवहरूले विस्तृत रूपमा उठाए। तर अन्ततः सबैको ध्यान आगामी महाधिवेशनको नेतृत्वमा केन्द्रित रह्यो।

पोखरेल पक्षले ८ मंसिरमै पोखरेलको उम्मेदवारी सार्वजनिक सभा गरी घोषणा गर्ने तयारी गरेको छ। ओली पक्षले भने स्वस्थ प्रतिस्पर्धा स्वीकार्य हुने तर पराजयपछि पार्टी नछोड्ने परिपाटी कायम रहनुपर्ने चेतावनी दिएको छ।

महाधिवेशन अघि एमालेभित्रको यो शक्ति–समीकरणले पार्टीभित्रको आन्तरिक विभाजन अझ स्पष्ट देखिएको छ। आगामी अध्यक्षका लागि ओली र पोखरेल बिचको प्रतिस्पर्धाले एमाले भित्र मात्रै होइन, राष्ट्रिय राजनीतिमा पनि ठूलो प्रभाव पार्ने संकेत देखिएको छ ।