कार्तिक ४, २०८२।
काठमाडौँ – प्रधानमन्त्री सुशीला कार्कीले अब राजनीतिक दल र जेन-जीबीच प्रत्यक्ष संवाद सुरु गर्नुपर्ने प्रस्ताव गरेकी छिन्। प्रधानमन्त्री निवास बालुवाटारमा मंगलबार आयोजित दलहरूको संयुक्त बैठकमा उनले राष्ट्रपति रामचन्द्र पौडेलले “संवादको ढोका” खोलेको भन्दै सबै पक्षबीच सहकार्य आवश्यक रहेको बताइन्।
प्रधानमन्त्री कार्कीले प्रारम्भिक चरणमा जेन-जी युवाहरूले दलहरूसँग संवादमा बस्न नचाहेको उल्लेख गर्दै भनिन्,
सुरुवातमा जेन-जीका युवाहरू संवाद गर्न इच्छुक थिएनन्, तर अब राष्ट्रपतिज्यूले मार्ग खुलाउनुभएको छ। अब सबै दलहरू र जेन-जी प्रतिनिधि मिलेर देशलाई स्थिरताको दिशामा लैजाऔं।
उनले आगामी निर्वाचनलाई राष्ट्रिय एकताको अवसरका रूपमा लिन आग्रह गर्दै भनिन्, चुनाव सफल बनाउन सबैको सहयोग अपरिहार्य छ। जसरी हुन्छ स्थिति सामान्यीकरण गर्दै लोकतान्त्रिक अभ्यासलाई सुदृढ गरौँ।
बैठकमा सहभागी राजनीतिक दलका नेताहरूले गृह मन्त्रालयको कार्यशैलीदेखि सुरक्षा तयारीसम्मका विषयमा प्रधानमन्त्रीलाई सुझाव दिएका थिए। प्रधानमन्त्री कार्कीले दलहरूले व्यक्त गरेका चासो सम्बोधन गर्न सरकार प्रतिबद्ध रहेको दोहोर्याइन्।
यसअघि राष्ट्रपति पौडेलले चुनावको वातावरण बनाउन “संवाद र सहकार्य” को प्रस्ताव गर्दै सरकार र विपक्षी दलहरूलाई छलफलका लागि आह्वान गरेका थिए। अब प्रधानमन्त्रीको प्रस्तावले जेन-जी आन्दोलनका प्रतिनिधिहरूसम्म संवाद गर्ने संकेत गरेको छ।
Related posts:
