कार्तिक २४, २०८२। प्रयास लामा
जनकपुरधाम – मधेश प्रदेश प्रमुख सुमित्रा सुवेदीलाई सरकारले पदबाट हटाउने निर्णय गरेको छ। सोमबार बसेको मन्त्रिपरिषद् बैठकले सुवेदीलाई पदमुक्त गर्ने निर्णय गरेको एक मन्त्रीले काठमाडौं दैनिकलाई जानकारी दिए।
गत शनिबार मुख्यमन्त्री जितेन्द्रप्रसाद सोनार (सोनल)ले राजीनामा दिएपछि सुवेदीले संविधानको धारा १६८(३) बमोजिम एमालेका सरोजकुमार यादवलाई बर्दिबासस्थित पानस होटलमा बिहान ४ बजे मुख्यमन्त्रीको रूपमा नियुक्त गरी शपथ गराएकी थिइन्।
तर उक्त कदम संविधान विपरीत रहेको भन्दै उनी विवादमा तानिएकी थिइन्। विपक्षी दलहरूले सुवेदीको कदमलाई “राजनीतिक हस्तक्षेप र संवैधानिक मर्यादाको उल्लङ्घन” भन्दै आलोचना गरेका थिए।
स्रोतका अनुसार, मन्त्रिपरिषद्को निर्णयपछि सुवेदीलाई हटाएर नयाँ प्रदेश प्रमुखको नियुक्ति गर्न तयारी गरिएको छ। प्रधानमन्त्रीको सिफारिसमा राष्ट्रपतिले चाँडै नयाँ प्रमुखको नियुक्ति गर्ने सम्भावना रहेको बताइएको छ।
राजनीतिक विश्लेषकहरूका भन्छन्, घटनाले संघीय संरचनामा केन्द्र र प्रदेशबीचको संवैधानिक सन्तुलनबारे नयाँ बहस उत्पन्न गरेको छ।
Related posts:
