साउन २१, २०८२।
काठमाडौं – नेपाल प्रहरीमा प्रहरी उपरीक्षक (SP) को पदबाट सेवा निवृत्त भएका अवधेश विष्ट अहिले कफी व्यवसायमा जुटिरहेका छन् । जागीरको अनुशासन र सेवा भाव बोकेका विष्ट अहिले ‘कुकर कफी’ नामक आकर्षक कफी पसलमार्फत समाजसेवाको नयाँ अध्याय सुरु गरिरहेका छन् ।
सेवा निवृत्त भएपछि विष्टले जब कफी व्यवसाय सुरु गरे तब धेरैले उनलाई प्रश्न गरे, ल यस्तो ठूलो पदबाट रिटायर भएर पनि कफी पसल खोलेको? तर विष्टले आलोचनालाई वास्ता नगरी निरन्तर मेहनत गर्दै आफ्नो कर्ममार्फत निरन्तर जवाफ दिइरहे, अहिले त्यही आलोचकहरू नै उनको पसलमा आएर कफी बनाउने सीप सिक्न चाहन्छन् ।
विष्टले कफी पसल खोल्नुको पछाडि भावनात्मक कारण पनि छ । उनी भन्छन्, घर नजिकको मोडमा बुबाले मन्दिर र चौतारी बनाउनुभएको थियो जहाँ मानिसहरू बसेर गफगाफ गर्थे । मैले बुबाको त्यसै स्थानलाई अझ आकर्षक सार्वजनिक स्थल बनाउने सोचले कफी पसल सुरु गरेको हुँ ।
कुकर कफी अहिले ७ जना युवालाई स्थायी रोजगारी दिन सफल भएको छ । विष्टको सोच र उद्यमशीलताले समुदायमै अवसर सिर्जना गरेको छ । उनले समाजमा उदाहरणीय काम गर्दै पूर्वसरकारी कर्मचारीको जीवन पनि कस्तो सशक्त र प्रेरणादायी हुन सक्छ भन्ने प्रमाणित गरिदिएका छन् ।
Related posts:
