कार्तिक २८, २०८२। काठमाडौं दैनिक संवाददाता
जनकपुरधाम — धनुषामा एक वडाध्यक्षको प्रहरीकै गोली प्रहारमा मृत्यु भएको छ। मिथिला बिहारी नगरपालिका–९ का वडाध्यक्ष बिन्देश्वर यादवलाई गाउँकै प्रहरी शम्भू यादवले गोली हानेर हत्या गरेको पुष्टि भएको छ।
घटना शुक्रबार कार्तिक २८ गते साँझ भएको हो। स्थानीयका अनुसार गाउँमा हुँदै गरेको श्राद्ध भोजमा दुई पक्षबीच विवाद उत्पन्न भएपछि वडाध्यक्ष विवाद मिलाउन पुगेका थिए। सोही क्रममा प्रहरी अधिकृत शम्भूले गोली चलाउँदा वडाध्यक्षको घटनास्थलमै मृत्यु भएको बताइएको छ।
हत्या आरोपित प्रहरी शम्भू यादवलाई धनुषा प्रहरीले नियन्त्रणमा लिएको छ।
प्रहरी नायब उपरीक्षक (डीएसपी) गणेशबहादुर बमका अनुसार घटनाबारे विस्तृत अनुसन्धान भइरहेको छ।
उनका अनुसार, गोली प्रहारबाट दुई जना घाइते पनि भएका छन्, जसको जनकपुरस्थित प्रदेश अस्पतालमा उपचार भइरहेको छ।
घटना कसरी भयो, गोली किन चलाइयो, विवाद कति ठूलो थियो, यी सबै विषयमा अनुसन्धान जारी रहेको प्रहरीले जनाएको छ।
Related posts:
