साउन २६, २०८२।
काठमाडौं – गाजामा हमासको बन्धक बनेका नेपाली नागरिक विपिन जोशीका आमा र बहिनी आज इजरायल प्रस्थान गरेका छन्। उनीहरू विपिनको अवस्थाबारे प्रत्यक्ष जानकारी लिन र सम्भावित उद्धार प्रयासमा नजिकबाट संलग्न रहनका लागि उनीहरु इजरायल प्रस्थान गरेका हुन्।
विपिन जोशी सन् २०२३ को अक्टोबर ७ मा इजरायलको दक्षिणी क्षेत्रमा रहेको किब्बुज अलुमिममा “Learn and Earn” कार्यक्रमअन्तर्गत कृषिशिक्षा गर्दै थिए। त्यसै दिन हमासद्वारा भएको आक्रमणमा १७ नेपाली विद्यार्थीमध्ये १० जनाको मृत्यु भएको थियो। विपिन भने अन्यको ज्यान बचाउन खोज्ने क्रममा अपहरण भई गाजातर्फ लगिएका थिए।
हमासद्वारा सार्वजनिक भिडियो र अन्य प्रमाणका आधारमा विपिन जीवितै गाजामा राखिएको पुष्टि भए पनि उनको स्वास्थ्य अवस्था र ठेगाना हालसम्म सार्वजनिक भएको छैन। उनी अक्टोबर ७ का हमलामा बन्धक बनाइएका २५१ जनामध्ये बाँकी रहेका करिब २० जीवित बन्धकमध्ये एक मानिन्छन्।
परिवारको तर्फबाट विपिनको १७ वर्षीया बहिनी पुष्पा जोशी र आमा निरन्तर काठमाडौं आएर प्रधानमन्त्री, परराष्ट्र मन्त्री, राष्ट्रपति र इजरायल दूतावाससँग भेटघाट गर्दै आएका छन्। उनीहरूले नेपाल सरकारले प्रत्यक्ष वार्ता र अन्तर्राष्ट्रिय दबाबमार्फत विपिनको शीघ्र उद्धारको लागि ठोस कदम चाल्न आग्रह गर्दै आएका छन्।
नेपाल सरकारले विपिनको रिहाइका लागि कतार र इजिप्टमार्फत मध्यस्थता गर्न प्रयास गरेको बताएको छ। यसअन्तर्गत परराष्ट्रमन्त्री अर्जु राणा देउवाले इजिप्ट र कतारका वरिष्ठ अधिकारीहरूसँग विशेष पहलको आग्रह गरेका थिए।
प्रधानमन्त्री केपी शर्मा ओलीले समेत मार्च २०२५ मा इजिप्टी राष्ट्रपति अब्देल फत्ताह अल–सीसीसँग फोन वार्ता गरी बन्धक विमोचनको दोस्रो चरणमा विपिनलाई प्राथमिकतामा राख्न आग्रह गरेका थिए। तर हालसम्म कुनै निर्णायक प्रगति भएको छैन।
दोस्रो चरणको बन्धक रिहाई सम्झौता रोकिएको अन्तर्राष्ट्रिय समाचारहरूले जनाएका छन्, जसले विपिनसहित अन्य बन्धकको उद्धार प्रक्रिया अझ जटिल बनाएको छ। यसबीच काठमाडौंमा र अन्तर्राष्ट्रिय स्तरमा ‘विपिनलाई मुक्त गर’ अभियान सञ्चालन हुँदै आएको छ।
परिवार, प्रवासी नेपाली र नागरिक समाजले विपिनको सुरक्षित र शीघ्र उद्धारका लागि निरन्तर दबाब दिइरहेका छन्। कुनै ठोस नतिजा नआएपछि उनीहरूले अन्तर्राष्ट्रिय समुदायसँग पनि सहयोगको याचना गर्न थालेका छन्।
Related posts:
