कात्तिक ३०, २०८२। काठमाडौं दैनिक संवाददाता
काठमाडौँ – नेपाली कांग्रेसभित्र महिनौँदेखि रहँदै आएको महाधिवेशनसम्बन्धी विवाद चर्किँदै गएपछि सभापति शेरबहादुर देउवा पुनः सक्रिय भएका छन्। सिंगापुरबाट उपचार गराएर स्वदेश फर्केका देउवाले शनिबार कार्यवाहक सभापति पूर्णबहादुर खड्का, प्रवक्ता प्रकाश शरण महत र संस्थापन पक्षका नेतासँग अनौपचारिक भेटघाट सुरु गरेका छन्।
पार्टीभित्र नियमित महाधिवेशन निर्वाचनअघि गर्ने कि पछि भन्ने विषयमा तीव्र मतभेद बढिरहेका बेला देउवाको सक्रियता निर्णायक मोडका रूपमा हेरिएको छ।
महाधिवेशनको विषयलाई लिएर केन्द्रीय कार्यसमिति बैठक पटक–पटक सारिँदा कार्यकर्ताबीच असन्तोष बढेको छ। कार्यवाहक सभापति खड्काले हतारमा निर्णय गरेर पछुताउनुभन्दा ‘एकता र धैर्यता’ आवश्यक रहेको बताए पनि नेताहरूले उनको निर्णय क्षमतामाथि सार्वजनिक रूपमा प्रश्न उठाउन थालेका छन्।
महामन्त्री गगन थापाले ‘अब सोमबारभन्दा अघि बैठक सार्न नहुने’ भन्दै तत्कालै निर्णय लिन आग्रह गरेका छन्।
महामन्त्री गगन थापाले समयको चापका कारण नियमित महाधिवेशन सम्भव नभएको र विशेष महाधिवेशन नै समाधान हुने बताएका छन्। हामी फेरि नयाँ रूपमा प्रस्तुत हुनुपर्छ, जनता अब ढिलो गर्नेको पक्षमा छैनन्, उनले भने।
महाधिवेशन विवादले कांग्रेसका आन्तरिक क्रियाकलाप ठप्प भएका छन्। देशभरका कार्यकर्ताले केन्द्रीय समितिको सोमबार हुने भनिएको बैठकले ल्याउने निर्णयको प्रतीक्षा गरिरहेका छन्।
Related posts:
