उत्तर कोरियासँग ११–० को हारपछि नेपाल यू–२० महिला एसियन कप छनोटबाट बाहिर

साउन २६, २०८२।

काठमाडौँ – नेपाल यू–२० महिला फुटबल टोली अर्को वर्ष थाइल्यान्डमा हुने एसियन कपमा छनोट हुन असफल भएको छ। आइतबार थिम्पुको चाङलिमिथाङ रंगशालामा भएको अन्तिम खेलमा समूहको बलियो टिम उत्तर कोरियासँग नेपाल ११–० ले पराजित भयो।

यो हारपछि नेपाल समूहको दोस्रो स्थानमा रह्यो। आठ समूहका दोस्रो स्थान हासिल गर्ने टिममध्ये सबैभन्दा पुछारमा रहँदै उत्कृष्ट तीन टिमको सूचीमा पर्न सकेन। यससँगै नेपालको अभियान समाप्त भयो।

समूहको अन्य खेलमा साउदी अरेबियाले भुटानलाई २–१ ले हराउँदै तेस्रो स्थानमा रह्यो, जबकि आयोजक भुटान एक अंकसहित अन्तिम स्थानमा रह्यो।

थिम्पुको चाङलिमिथाङ रंगशालामा भएको खेलमा यो समूहको तीनपल्टको विश्व र दुईपल्टको एसियाली च्याम्पियन उत्तर कोरियाले पहिलो हाफमा पाँच गोल गरेको थियो । पूरा अवधिमा आक्रामक रहेको उत्तर कोरियाका लागि हो क्योङले पाँच गोल गरिन् । यस्तै चोए चो–गमले पनि तीन गोल गरिन् ।

उत्तर कोरियाले ८८ मिनेटयता इन्ज्युरी समयमा चार गोल गरेको थियो । उत्तर कोरियाले यसअघि साउदी अरेबियालाई १५–० र भुटानलाई १०–० ले हराएको थियो । यस क्रममा उत्तर कोरियाले तीन खेलमा कुल ३६ गोल गरेको हो ।

नेपालका प्रशिक्षक यामप्रसाद गुरुङले खेलाडीहरूको प्रयासको प्रशंसा गर्दै भने, हाम्रो योजना कम गोल खानु थियो तर उनीहरूले अत्यधिक दबाब सिर्जना गरे। यति बलियो टिमविरुद्ध खेल्नु आफैंमा चुनौती थियो र खेलाडीहरूले आफ्नो सक्दो  प्रयास गरेका छन्।

नेपालका लागि छनोटमा असफल हुनुको मुख्य कारण भुटानविरुद्धको १–१ बराबरी परिणाम मानिएको छ जसको ठूलो मूल्य अन्त्यमा चुकाउनु पर्‍यो।