इजरायल पुगे विपिन जोशीकी आमा र बहिनी, हमासको बन्धकबाट छोराको रिहाइका लागि अन्तर्राष्ट्रिय अपिल

साउन २७, २०८२।

काठमाडौं – कञ्चनपुरका २२ वर्षीय विपिन जोशीको रिहाइका लागि उनकी आमा पद्मा र बहिनी पुष्पा सोमबार बेलुकी इजरायल पुगेका छन्। प्यालेस्टिनी लडाकु समूह हमासको नियन्त्रणमा रहेका विपिनलाई छुटाउन अन्तर्राष्ट्रिय दबाब सिर्जना गर्न उनीहरूलाई इजरायल सरकारले आमन्त्रण गरेको हो।

वेनगुरियन अन्तर्राष्ट्रिय विमानस्थलमा अवतरणलगत्तै भावुक हुँदै आमा पद्माले भनिन्, हामी विपिनलाई लिन आएका हौं। सबैले मद्दत गर्नुस्, मेरो छोरालाई मुक्त गराएर घर पठाइदिनुस्। बहिनी पुष्पाले पनि आँसु रोक्न सकिन र भावुक हुँदै अपिल गरिन्, हामी टाढाबाट आएका छौँ दाजुलाई बिनाकारण  नराख्नुस्। उहाँ पढ्न मात्र आएका हुन्।

इजरायली विदेश मन्त्रालयका अधिकारीहरूले उनीहरूलाई प्रधानमन्त्री, रक्षामन्त्री, सेना प्रमुख लगायतसँग भेट गराउने र हमासको कब्जामा रहेका क्षेत्रमा लैजाने योजना बनाएका छन्। यसपछि राष्ट्रसंघमा उपस्थित गराई विपिनको रिहाइका लागि अन्तर्राष्ट्रिय दबाब बढाउने तयारी छ।

७ अक्टोबर २०२३ मा हमासले दक्षिण इजरायलको किबुजमा आक्रमण गर्दा १,२०० जनाको मृत्यु भएको थियो र विपिनसहित २५१ जना बन्धक बनाइएका थिए। तीमध्ये अझै ५० जनालाई फिर्ता गरिएको छैन। विपिन ‘लर्न एन्ड अर्न’ कार्यक्रमअन्तर्गत कृषि अध्ययनका लागि इजरायल गएका थिए।

इजरायली विशेष फोर्सका क्याप्टेन नादभ बेन याहुदाले विपिनलाई “वीर” भन्दै उनको रिहाइका लागि सक्दो प्रयास गर्ने प्रतिज्ञा गरेका छन्। नेपाली राजदूत धनप्रसाद पण्डितका अनुसार इजरायल सरकार विपिनको अवस्थाबारे स्पष्ट जानकारी नदिए पनि जीवित रहेको अनुमान छ।

नेपाल सरकारले पनि कतारमार्फत रिहाइको पहल गर्दै आएको छ। परिवारले राष्ट्रपति, प्रधानमन्त्री र उच्च अधिकारीलाई पटक–पटक भेटेर विपिनलाई सुरक्षित फर्काउन अपिल गरिसकेको छ।