युएईले भिसा आंशिक खोल्यो, सरकारी र विशेष सेक्टरमा नेपाली कामदारको भिसा जारी

मंसिर ३, २०८२।  काठमाडौं दैनिक संवाददाता

काठमाडौ – संयुक्त अरब इमिरेट्स (यूएई) ले जेनजी आन्दोलनपछि नेपालीहरूको लागि भिसा आंशिक रूपमा मात्रै खोल्ने निर्णय गरेको छ। यसअघि यूएईले सुरक्षा कारण देखाएर भिजिट र वर्किङ भिसामा कडाइ गरेको थियो।

नेपाल वैदेशिक रोजगार व्यवसायी संघका अनुसार, भिसा आंशिक रूपमा मात्र खुला भएको हो। सरकारी तथा गैरसरकारी क्षेत्रका विशेष सेक्टरमा मात्रै वर्किङ भिसा जारी भइरहेको छ। सेमीगभर्मेन्ट र सरकारी निकायसँग सम्बन्धित कम्पनीहरूका लागि भिसा अनुमोदन भइरहेको छ, तर अन्य व्यक्तिहरूका लागि कुनै स्पष्ट जानकारी उपलब्ध छैन।

नेपालको परराष्ट्र मन्त्रालयले यूएई सरकारसँग निरन्तर छलफल गर्दै भिसामा देखिएको असहजता हटाउने प्रयास गरिरहेको जनाएको छ। परराष्ट्र मन्त्रालयका प्रवक्ता लोकबहादुर पौडेल क्षेत्रीका अनुसार, नेपालस्थित यूएई दूतावासले समेत यूएईका अधिकारीहरूसँग निरन्तर छलफल जारी राखेको बताइएको छ ।

यूएईले भदौ ३० गतेदेखि भिसामा कडाइ गरेको थियो । भिसामा कडाइ गर्नुको औपचारिक जानकारी नदिएको यूएईले अनौपचारिक रूपमा भने नेपालको जेनजी आन्दोलनपछि देखिएको सुरक्षा चुनौतीलाई कारण देखाएको थियो ।

प्रमुख श्रम गन्तव्य मानिएको यूएईले भिसामा कडाइ गरेपछि एक महिनामै त्यहाँ पुग्ने औसत ९ हजार ७ सय प्रभावित भएका थिए । भदौमा १९ हजार ६ सय २ जनाले श्रम स्वीकृति लिएकोमा असोजमा घटेर ९ हजार ८ सय ९८ जना पुगेका थिए।

भिसामा कडाइ गर्दा यूएईको श्रम मन्त्रालयबाट श्रम अनुमतिपत्र अर्थात ‘मोल’ लिएका ४ हजारभन्दा बढी भिसा पाउनबाट वञ्चित भएका थिए । अहिले मोल जारी भएकाहरूको हकमा भिसा आउने गरेको म्यानपावर व्यवसायीहरूले बताएका छन् ।

व्यवसायीहरूले सुरक्षालाई देखाएर भिसा रोक्न नहुने बताउँदै त्यसका लागि सरकारको तर्फबाट कूटनीतिक पहल प्रभावकारी नभएको आरोप लगाउँदै आएका छन् ।