भदौ २७, २०८२।
काठमाडौं – जारी राजनीतिक संकटको निकास खोज्न राष्ट्रपति रामचन्द्र पौडेल शीतल निवासमा मध्यरातसम्म सक्रिय बनेका छन्। नयाँ सरकार प्रमुख कसलाई र कसरी बनाउने भन्ने विषयमा उनले सभामुख देवराज घिमिरे, संविधानविद्हरू र प्रमुख दलका नेताहरूसँग निरन्तर परामर्श गरेका छन्।
स्रोतका अनुसार सभामुखमार्फत राष्ट्रपति पौडेलले कामचलाउ प्रधानमन्त्री केपी शर्मा ओलीसहित केही नेताहरूसँग सन्देश पठाएका छन्। लामो समय सरकार विहीनताको अवस्थाले मुलुकलाई अस्थिर बनाउन सक्ने भन्दै सबैसँग सहमति खोजिएको बताइएको छ।
यसबीचमा जेन–जी आन्दोलनरत समूहले ‘भर्चुअल’ मतदानमार्फत पूर्वप्रधानन्यायाधीश सुशीला कार्कीलाई अन्तरिम सरकार प्रमुखको उम्मेदवार अघि सारेको छ। यो प्रस्तावलाई काठमाडौं महानगरपालिकाका मेयर बालेन्द्र (बालेन) शाहले समर्थन गरेका छन्। तर उनले संसद् विघटन र संवैधानिक निकायका पदाधिकारी नियुक्ति खारेज हुनुपर्ने सर्त पनि अघि सारेका छन्।
प्रधानसेनापति अशोकराज सिग्देलले आन्दोलनरत पक्षहरूसँग दिनभर छलफल गरी त्यसको जानकारी राष्ट्रपतिलाई गराएका छन्। सुशीला कार्कीलाई प्रधानमन्त्री बनाउन सर्वपक्षीय सहमति नजिक पुगे पनि संसद् विघटनको विषय भने अझै विवादमै छ।
Related posts:
