कार्तिक २६, २०८२। उपसना पौडेल
काठमाडौं – नेपाल सरकारले जापानमा प्राविधिक अभ्यासार्थी कामदार पठाउने निर्देशिका २०६६ खारेज गर्ने तयारीमा छ। श्रम, रोजगार तथा सामाजिक सुरक्षा मन्त्रालयले यस विषयमा अध्ययनका लागि सहसचिव पिताम्बर घिमिरेको संयोजकत्वमा समिति गठन गरेको छ। समितिले दिने सुझावका आधारमा निर्देशिका खारेज गरी नयाँ प्रणाली लागू गरिने तयारी मन्त्रालयले जनाएको छ।
सन् २०१७ मै जापानले पुरानो जिट्को प्रणाली (JITCO) खारेज गरेर टेक्निकल इन्टर्न ट्रेनिङ प्रोग्राम (TITP) सुरु गरेको थियो। यद्यपि नेपालले अझै पनि सोही पुरानो निर्देशिका अनुसार कामदार पठाइरहेको छ। जापानले अब सन् २०२७ देखि “Employment for Skill Development (ESD)” नामक नयाँ कार्यक्रम ल्याउँदैछ।
श्रम मन्त्रालयका एक अधिकारीका अनुसार, निर्देशिका खारेजपछि नयाँ प्रणालीअनुसार श्रमिक पठाइनेछ र त्यसका लागि समिति अध्ययनमा रहेको बताएको छ।
नेपाल वैदेशिक रोजगार व्यवसायी संघका सचिव कुन्छा दोर्जे दिम्दोङले भने, पुरानो जिट्को लाइसेन्स खारेज गरेर सबै म्यानपावर कम्पनीले समान अवसर पाउनुपर्ने हाम्रो माग हो।
विगतमा जिट्कोमा सूचीकृत ४८२ म्यानपावर कम्पनीमध्ये धेरैले नयाँ प्रणालीमा समायोजन हुन नसकेपछि लाइसेन्स नवीकरण गर्न छाडेका छन्। अब श्रम मन्त्रालयले पुरानो प्रणाली खारेज गरी सबै व्यवसायीलाई समान अवसर दिने नयाँ मार्गनिर्देशन ल्याउने सम्भावना रहेको छ ।
Related posts:
