एनपीएल तयारीको अन्तिम चरण: सिट जडान सकियो, फ्लडलाइट जडान अझै जारी

कार्तिक २६, २०८२। प्रयास लामा

काठमाडौं – मंसिर १ गतेबाट सुरु हुने नेपाल प्रिमियर लिग (एनपीएल) को दोस्रो संस्करणको तयारी अन्तिम चरणमा पुगेको छ । त्रिभुवन विश्वविद्यालय क्रिकेट मैदानमा १० हजार सिट क्षमताको आरसीसी प्यारापिट निर्माण पूरा भइसकेको छ भने कुर्सी जडानसमेत सम्पन्न भएको छ । तर फ्लडलाइट जडानको काम भने अझै जारी छ ।

ललितपुरस्थित विशन–ईश्वरी जोइन्ट भेन्चर ले फ्लडलाइट जडानको जिम्मा पाएको हो । कम्पनीका प्रतिनिधि सौरभ शाहका अनुसार हालसम्म तीनवटा पोलमा लाइट जडान सकिएको छ भने बाँकी पोलहरूमा तीव्र गतिमा काम भइरहेको छ । हामीले बिहीबार वा शुक्रबारसम्म सबै पोलमा बत्ती जडान र परीक्षण सक्ने योजना बनाएका छौं, शाहले बताए ।

प्रत्येक पोलमा ७० वटा बत्ती जडान गर्नुपर्ने र कुल ४२० बत्ती जडानको योजना रहेको उनले जानकारी दिए । सबै पोलमा काम सकिएपछि एमिङ (फोकस मिलाउने) र केबल जडानका कामहरू हुनेछ । यसपटक जेनेरेटरमार्फत फ्लडलाइट बाल्ने तयारी गरिएको छ, किनभने विद्युत् प्राधिकरणको लाइनबाट सीधा आपूर्ति गर्न चुनौती देखिएको छ ।

क्यानले यसपटकका ३२ मध्ये २३ खेल फ्लडलाइटमा खेलाउने गरी तालिका सार्वजनिक गरिसकेको छ । यदि काम समयमै पूरा भयो भने नेपालमा पहिलो पटक फ्लडलाइटमा फ्रेन्चाइज क्रिकेट खेल हुनेछ ।

एनपीएलको पहिलो खेलमा जनकपुर बोल्ट्स र काठमाडौं गोर्खाज बीच प्रतिस्पर्धा हुनेछ, जुन साँझको समयमा खेलिनेछ । प्रतियोगितामा ८ फ्रेन्चाइज टोलीबीच प्रतिस्पर्धा हुनेछ र शीर्ष चार टोली प्लेअफमा पुग्नेछन् ।

बीकेओआई–केसीडीसी–बीजी जेभीले निर्माण गरेको प्यारापिटमा पाँच वर्षसम्म कुर्सी मर्मतको जिम्मेवारी सोही कम्पनीको हुनेछ । सम्झौताअनुसार काम वैशाखमा सकिनुपर्ने भए पनि ढिलाइ भएपछि सरकारले कम्पनीलाई दैनिक जरिवाना तोकेको थियो ।

आवश्यक सबै तयारी समयमै सम्पन्न भए नेपालमा पहिलोपटक फ्लडलाइटमा फ्रेन्चाइज क्रिकेट को ऐतिहासिक अध्याय सुरु हुनेछ ।