एमालेबाट अलग्गिएका भिम रावल नेकपामा जोडिँदै

कार्तिक २६, २०८२। काठमाडौं दैनिक संवाददाता

काठमाडौं – एमालेबाट निष्कासित पूर्वउपाध्यक्ष भीम रावल अब नयाँ राजनीतिक यात्रामा अघि बढ्न लागेका छन् । उनले माओवादी अध्यक्ष पुष्पकमल दाहाल ‘प्रचण्ड’ र नेकपा (एकीकृत समाजवादी) का अध्यक्ष माधवकुमार नेपाल नेतृत्वको नवगठित नेपाली कम्युनिस्ट पार्टी (नेकपा) मा औपचारिक रूपमा प्रवेश गर्ने भएका हुन् ।

रावलको प्रवेशसँगै दाहाल–नेपाल नेतृत्वको नेकपाले सुदूरपश्चिम क्षेत्रमा नयाँ सन्देश दिन खोजेको बुझिएको छ । बुधबार काठमाडौंमा आयोजना हुने कार्यक्रममा मातृभूमि जागरण अभियान पनि यसै पार्टीमा समाहित हुँदैछ ।

छलफलमा सहभागी नेताहरूका अनुसार, रावललाई पार्टीको सचिवालय सदस्यका रूपमा छैटौं वरीयता दिइनेछ । साथै उनलाई पार्टी दस्तावेज लेखन समितिको जिम्मेवारी पनि दिइने सहमति भएको स्रोतले जनाएको छ ।

रावलनिकट नेता हर्कबहादुर कुँवरका अनुसार, रावल र नेकपा नेतृत्वबीच पाँचबुँदे सहमति भएको छ, जसमा ६ महिनाभित्र पार्टीको महाधिवेशन गर्ने, रावल पक्षका कार्यकर्तालाई उचित स्थान दिने र सुदूरपश्चिममा पार्टी बलियो बनाउने उद्देश्य राखिएको छ ।

एमालेबाट निष्कासित भएपछि रावलले आफ्नै संयोजकत्वमा मातृभूमि जागरण अभियान सुरु गरेका थिए । तर उक्त अभियान सुदूरपश्चिमभन्दा बाहिर विशेष प्रभाव जमाउन सकेको थिएन । अब नयाँ नेकपामा प्रवेशसँगै उनले आफ्नो संगठनात्मक बल र राजनीतिक हैसियत पुनःस्थापित गर्ने अपेक्षा गरिएको छ ।

सुदूरपश्चिमको राजनीतिमा रावलको प्रवेशले एमालेका लागि चुनौती बढ्ने विश्लेषण भइरहेका छन् । स्थानीय नेताहरूका अनुसार, अछामसहितका जिल्लामा रावलको प्रभाव अझै बलियो छ ।

यसअघि प्रचण्डले अछाममा आयोजित एक कार्यक्रममा रावललाई सहकार्यको प्रस्ताव दिएका थिए । त्यतिबेला उनले भनेका थिए, अब समय खेर नफालौं, आउनुस् सहकार्य गरौं।

रावलको नयाँ कदमले एमाले अध्यक्ष केपी शर्मा ओली नेतृत्वमाथि पनि राजनीतिक दबाब सिर्जना गर्ने अनुमान गरिएको छ ।