काठमाडौं – साउदी अरेबियाले विभिन्न मुद्दामा जेल सजाय भोगिरहेका ६२ जना नेपाली नागरिकलाई रिहा गरेको छ। इस्लामिक नयाँ वर्ष १४४६ हिजरी तथा ईदको अवसर पारेर उनीहरूलाई क्षमादान दिइएको हो।
साउदी सरकारको यो निर्णयले राहत पाएका नेपालीहरू अब कानुनी प्रक्रिया पूरा गरी नेपाल फर्कन सक्ने छन्।
यस घटनापछि परराष्ट्र मन्त्रालयले एक विज्ञप्ति जारी गर्दै साउदी सरकारप्रति आभार प्रकट गरेको छ। मन्त्रालयले नेपाली नागरिकहरूप्रति देखाइएको सद्भावपूर्ण व्यवहारको उच्च प्रशंसा गर्दै यस कदमले नेपाल–साउदी सम्बन्ध थप सुदृढ हुने विश्वास पनि व्यक्त गरेको छ।
साउदी जेलमा पर्ने अधिकांश नेपालीहरू काममा जाने क्रममा हुने कागजी कमजोरी, वीजा म्याद सकिने, आपराधिक मुद्दा वा अवैध बसोबास र गैरकानुनी काम गर्ने लगायत कारणले पक्राउ पर्ने गर्दछन्। यस्तो अवस्थामा उनीहरूलाई छुटाउन नेपाली दूतावास र परराष्ट्र मन्त्रालयले पहल गर्दै आएका छन्।
परराष्ट्र मन्त्रालयका अनुसार रिहाइ पाएका सबै नेपालीहरू साउदी सरकारको क्षमादान नीति अन्तर्गत परेका हुन्। अब उनीहरूलाई नेपाली नियोगमार्फत आवश्यक कागजी प्रक्रिया मिलाएर स्वदेश फर्काउने तयारी भइरहेको मन्त्रालयले जनाएको छ।
जाग्रेब, क्रोएसिया – नेपाली दूतावास भियना, अष्ट्रियाको पूर्व निर्धारित सूचना अनुसार यही अगस्ट १, २ र ३ गते क्रोएसियाको राजधानी जाग्रेबमा आयोजित तीन दिने मोबाइल घुम्ती सेवा शिविर सफलतापूर्वक सम्पन्न भएको छ।
शिविरमा विशेष गरी Work Permit वा ID Card को म्याद सकिएको, रद्द भएको, राहदानी हराएको वा क्षति पुगेका कारण दूतावाससम्म पुग्न नसक्ने नेपालीहरूको सेवा उद्देश्यले आयोजना गरिएको थियो।
क्रोएसियाका विभिन्न क्षेत्रमा बसोबास गर्ने करिब ३०० नेपाली सेवाग्राहीहरूले बायोमेट्रिक प्रक्रिया पूरा गरी राहदानी नविकरणका लागि सेवा लिएका छन्। यो प्रकारको शिविर वर्षमा एक पटक मात्र सञ्चालन हुने विशेष सेवा हो।
शिविरमा नेपाली दूतावासका प्रथम सचिव श्री अनिल लम्सालको नेतृत्वमा दूतावासको टोली क्रोएसिया पुगेको थियो। यस सेवाको सफल व्यवस्थापन र समन्वयमा गैरआवासीय नेपाली संघ (NRNA) क्रोएसिया, तामाङ समाज क्रोएसियासहित अन्य नेपाली समाज संस्थाहरूले पनि उल्लेखनीय सहयोग गरेका छन्।
यस शिविर आयोजनामा योगदान पुर्याउने सबैप्रति तामाङ समाज क्रोएसिया परिवारले विशेष आभार व्यक्त गरेको छ।
दूतावासका प्रथम सचिव अनिल लम्साल, एनआरएनए क्रोएसियाका अध्यक्ष तथा तामाङ समाजका प्रमुख सल्लाहकार श्री साइमन लामा, तामाङ समाज क्रोएसियाका अध्यक्ष लगायत सम्पूर्ण टिम, पत्रकार, शुभेच्छुक तथा प्रत्यक्ष-अप्रत्यक्ष रुपमा सहयोग गर्ने सबैलाई धन्यवाद ज्ञापन गरेको हो।
