काठमाडौं, साउन ४ – वैदेशिक रोजगारीमा जाने विदेशमा काम गर्ने सपना बोकेका नेपालीहरू ठगीको जालोमा परिरहेको पुष्टि हुने एक तथ्यांक सार्वजनिक भएको छ।
वैदेशिक रोजगार विभागका अनुसार आर्थिक वर्ष २०८१/८२ मा वैदेशिक रोजगारीको नाममा ३२ करोड ८७ लाख रुपैयाँभन्दा बढीको ठगी भएको छ। विभागमा मात्र ५,६३२ वटा ठगीका उजुरीहरू दर्ता भएका छन्।
उजुरीको अवस्था:
५२८ उजुरीमा मिलापत्र भएको छ।
२६७ उजुरी अदालतमा दायर गरिएका छन्।
असार महिनामा मात्रै ६८१ वटा उजुरी दर्ता भएका छन्।प्रहरी शाखाका छुट्टै तथ्यांक अनुसार पनि ५,३३७ उजुरीहरू दर्ता भएका छन्, जसमध्ये अधिकांश फछ्यौट गरिए पनि अझै ४४९ उजुरी बाँकी छन्। फछ्यौट प्रक्रिया मार्फत १२ लाख रुपैयाँ असुल गरिएको छ।
विदेशमा आकर्षक रोजगारीको प्रलोभन देखाएर नेपाली युवाहरूबाट लाखौं असुलेर फरार हुने, श्रमिकलाई गन्तव्य मुलुकमा पठाएर सम्झौता विपरीत काम गराउने घटनाहरू सामान्यजस्तै बनेका छन्।
स्थानीय दलाल, म्यानपावर कम्पनी, ट्राभल एजेन्सी, कन्सल्टेन्सीहरू यस्ता ठगीका जालोमा सक्रिय रहेको पुष्टि विभागले गरेको छ।
कानुनी प्रावधान:
वैदेशिक रोजगार ऐन अनुसार —
इजाजतपत्रविना व्यवसाय गर्न पाइँदैन।
नाबालिगलाई विदेश पठाउन पाइँदैन।
दोहोरो सम्झौता, पारिश्रमिक नदिनेजस्ता कार्यहरूमा ठगी मानिन्छ।
ठगिएका श्रमिकले विभाग वा प्रहरीमा उजुरी दिन सक्नेछन् तर विभागले मिलापत्र नभएको उजुरीलाई अदालतमा पेस गर्ने प्रक्रिया अगाडि बढाएको बताइएको छ।
वैदेशिक रोजगार विभागका महानिर्देशक कमल भट्टराईका अनुसार विभागले सत्य तथ्यमा आधारित न्याय प्रणाली निर्माणमा जोड दिएको छ। मुद्दा दर्ता, अनुसन्धान र अभियोजनलाई प्राथमिकता दिइएको छ।
