विवेकशील–रास्वपा एकताले वैकल्पिक राजनीतिमा नयाँ मोड

मंसिर १४, २०८२। काठमाडौ दैनिक संवाददाता

काठमाडौं – वैकल्पिक राजनीतिको दुई अलग–अलग धार विवेकशीलको ‘मन जित्ने’ विरासत र रास्वपाको ‘मत जित्ने’ बल आइतबार एकै मञ्चमा आएपछि नयाँ राजनीतिक ऊर्जा पैदा भएको छ। राष्ट्रिय सभागृहमा आयोजित रास्वपा–विवेकशील एकता सभा कुनै साधारण कार्यक्रम थिएन, यो वैकल्पिक राजनीतिलाई एक ठाउँमा उभ्याउने ठूलो संदेश थियो।

आइतबारको सभामा कुनै शर्त, भागबण्डा वा पद–साना सम्झौताहरू उठेनन्। विवेकशील साझा पार्टी र रास्वपा बीच भएको पाँच बुँदे सहमति नै यसको प्रमाण हो। सहमतिको मूलमा विवेकशील अभियान, स्व. उज्वल थापाको योगदान र वैकल्पिक राजनीतिक संस्कारलाई रास्वपाले औपचारिक मान्यता दिएको छ।

सभा सुरु भइरहँदा नेतृ डा. तोसिमा कार्कीले स्वागत मन्तव्य दिइरहेकी थिइन्, अनि हलतर्फ छिर्दै गरेका महेन्द्र पाण्डेले पत्रकारहरूसँग एक वाक्यमा एकताको मर्म बताए।
सचेत नागरिकहरू वैकल्पिक शक्तिमा एकीकृत हुनै पर्छ। यही बाटोबाट सभ्य राजनीति संभव छ।

विवेकशीलतर्फकी नेतृ रञ्जु दर्शनाले पनि एकतालाई नि:शर्त नै परिभाषित गरिन्, यो पद, सिट, टिकट वा शक्ति मागेर भएको एकता होइन; समान मूल्य–विचारको मिलन हो।

सभामा धेरैले स्व. उज्वल थापालाई सम्झिए। युवा नेतृत्व, हडताल–रहित विरोध, नागरिक सक्रियता र वैकल्पिक राजनीतिबारे उनले खोलेको बाटो रास्वपा–विवेकशील मेलमिलापले थप मजबुत बनाएको कार्यकर्ताहरूको धारणा थियो।

दुवैतर्फका शीर्ष नेताहरूले नयाँ पुस्ताले चाहेको राजनीति पुराना दलले सम्भव छैन भन्दै एउटै आवाज दोहोर्याए। सहमतिअनुसार, आगामी महाधिवेशनसम्म विवेकशीलका नेताहरूलाई रास्वपाले आफ्नै संघीय नेतृत्व मञ्चमा समायोजन गर्नेछ, जहाँ उनीहरूको वरियतासमेत केन्द्रीय सदस्यसरह हुनेछ।

सभा परिसरमा भेटिएका कार्यकर्ताहरूको भाव एउटै थियो
मन केन्द्रित राजनीति विवेकशीलले गर्‍यो, मत केन्द्रित राजनीति रास्वपाबाट अघि बढ्छ। यही संयोजनले वैकल्पिक धारलाई अब जनस्तरसम्म विस्तार गर्ने विश्वास उनीहरूको छ।

तस्वीरहरु: