काठमाडौं, साउन ६ – नेपाल प्रिमियर लिग (एनपीएल) अन्तर्गतको फ्रेन्चाइज टोली लुम्बिनी लायन्सले सोमबार आफ्नो नयाँ लोगो सार्वजनिक गरेको छ। टिमका अध्यक्ष ईश्वर जीसीका अनुसार, यो लोगो केवल एक ग्राफिकल परिवर्तन मात्र नभई लुम्बिनीको ऐतिहासिक, सांस्कृतिक र राष्ट्रिय भावनालाई प्रतिबिम्बित गर्ने गहिरो प्रयास हो।
नयाँ लोगोमा सिंह गर्जिरहेको छ जुन लुम्बिनी लायन्सको ‘लायन्स’ अर्थात् सिंहको साहसी भावना झल्काउने मूल प्रतीक हो। तर यसपटक सिंहको पछाडि मायादेवी मन्दिर, अशोक स्तम्भ, नेपालको राष्ट्रिय झन्डाको रङ, र चन्द्र–सूर्यको प्रतीकहरू समेत समेटिएका छन्। यी सबै तत्वहरू मिलाएर लुम्बिनीको गहिरो सन्देश र राष्ट्रिय पहिचानलाई टिममा आत्मसात् गरिएको बताइएको छ।
अध्यक्ष ईश्वर जीसीले बताएअनुसार यो लोगोले हाम्रो टिमको मात्र होइन लुम्बिनी र सम्पूर्ण नेपालको गौरवको पहिचान दिलाउनेछ। हामी खेलमार्फत नेपाललाई विश्वसामु चिनाउन चाहन्छौं।
लोगोको डिजाइनमा प्रयोग भएका प्रमुख संकेतहरू:
मायादेवी मन्दिर: बुद्धको जन्मस्थल
अशोक स्तम्भ: ऐतिहासिक महत्व बोकेको इ.पू. २४९ मा बनाइएको स्तम्भ
राष्ट्रिय झन्डाको रङ: रातो रङ, देशको आत्मसम्मान
चन्द्र–सूर्यको प्रतीक: नेपाली पहिचान र गौरव
लुम्बिनी लायन्सले यो लोगो परिवर्तनलाई केवल दृश्यात्मक फेरबदल मात्रा नभई टिमको आत्मा र दर्शनमा गहिरो अर्थ बोकेको प्रतिनिधित्वको रूपमा लिएको छ।
