मधेश प्रदेशका ५ सांसदलाई सभामुखले गरे पदमुक्त

कात्तिक २८, २०८२। काठमाडौं दैनिक संवाददाता

जनकपुरधाम – मधेश प्रदेशसभामा उत्पन्न भइरहेको राजनीतिक तनाबबीच सभामुख रामचन्द्र मण्डलले पाँच जना प्रदेशसभा सदस्यलाई पदमुक्त गरेका छन्। सभामुखविरुद्ध अविश्वास प्रस्ताव दर्ता भइसकेको संवेदनशील परिस्थितिको अवस्थामा आएको यस निर्णयले प्रदेशसभामा नयाँ तरंग पैदा गरेको छ।

सभामुख मण्डलले लगातार १० पटक प्रदेशसभा बैठकमा अनुपस्थित रहेको भन्दै पाँच जना सांसदलाई पदमुक्त गरेका हुन्। पदमुक्त हुनेमा नागरिक उनमुक्ति पार्टीकी उर्मिला देवी सिंह, जसपाका मनिष कुमार सुमन, संजय कुमार यादव, सिंहासन कलवार र सारदा प्रसाद कलवार रहेका छन्।

यस कारबाहीको आधार नेपाल संविधानको धारा १८० को उपधारा ‘घ’ रहेको सभामुखद्वारा जारी सूचनामा उल्लेख छ। उक्त प्रावधान अनुसार प्रदेशसभालाई सूचना नदिई लगातार १० बैठकमा अनुपस्थित रहे सदस्यको स्थान रिक्त हुने व्यवस्था छ।

सभामुखले २०८२ कात्तिक २७ गतेदेखि नै उनीहरूको पद रिक्त भएको सूचना जारी गरेका छन्। सूचनामा भनिएको छ,
लगातार १० बैठकमा अनुपस्थित रहेका सदस्यहरु मिति २०८२।०७।२७ गतेदेखि पदमुक्त भएको हुँदा सम्बन्धित सबैलाई जानकारी गराइन्छ।

यसअघि मधेश प्रदेशसभामा सभामुखविरुद्ध अविश्वास प्रस्ताव दर्ता भएपछि सत्ता–विपक्षीबीच हात हालाहालसम्मको घटना भएको थियो। राजनीतिक तरंगबीच आएको सभामुखको यो निर्णयले आगामी प्रक्रिया अझै जटिल बन्ने देखिन्छ।