फागुन २१ को चुनावमा बिदेशमा भएका नेपाली मतदाता सहभागी हुन नसक्ने

मंसिर १९, २०८२। काठमाडौं दैनिक संवाददाता

काठमाडौं – यही आउने फागुन २१ मा निर्धारण गरिएको प्रतिनिधिसभा निर्वाचनमा विदेशमा बस्ने नेपाली नागरिकको मतदान सहभागिता लगभग असम्भव जस्तै देखिएको छ।

जेनजी आन्दोलनपछि बनेको अन्तरिम सरकारले प्रवासी नेपालीलाई मतदान अधिकार दिने घोषणा गरे पनि कानुनी र व्यवस्थागत तयारी शून्य रहेकाले तत्काल कार्यान्वयन संभव नहुने निर्वाचन आयोगले स्पष्ट पारेको छ।

आयोगका अनुसार देशभित्र नै निर्वाचन तयारीका लागि १२० दिनको समय आवश्यक हुन्छ । तर विदेश मतदानका सम्बन्धमा कानुन, नियमावली र प्रक्रिया कुनै पनि अवस्था तयार नभएकाले फागुन २१ कै निर्वाचनमा प्रवासी नेपालीलाई सहभागी गराउन नसकिने निष्कर्ष बनाइएको हो।

आयोग स्रोतका अनुसार कार्यवाहक प्रमुख आयुक्त रामप्रसाद भण्डारीले राष्ट्रपति रामचन्द्र पौडेल र प्रधानमन्त्री सुशीला कार्कीलाई आधिकारिक रूपमा जानकारी गराइसकेका छन्।सरकार अध्यादेशमार्फत कानुनी आधार बनाउने तयारीमा रहे पनि व्यावहारिक रुपमा समय अत्यन्तै कम भएको मन्त्रीहरूले समेत बताएका छन्।

भारतीय भूमिमा सबैभन्दा धेरै नेपाली हुने भएकाले त्यहाँ बुथ व्यवस्थापन कठिन छ भने मध्यपूर्व र मलेसियाजस्ता मुलुकमा राजनीतिक प्रणालीको कारण मतदान अनुमति लिन पनि चुनौतीपूर्ण देखिएको छ।

हालसम्म कूटनीतिक पहल समेत सुरु नभएकाले यो निर्वाचनमै प्रवासी नेपालीलाई सहभागी गराउने योजना अर्को निर्वाचनसम्म धकेलिन सक्ने प्रबल सम्भावना देखिएको छ।यता, जेनजी समूह, नयाँ दल र पुराना दलका युवा नेताहरू भने कुनै हालतमा प्रवासी नेपालीले मतदान अधिकार पाउनुपर्ने पक्षमा छन्।

नेपाली कांग्रेस महामन्त्री गगन थापा भन्छन्, संविधानले सुनिश्चित गरेको अधिकार हो। यही निर्वाचनमै प्रवासी नेपालीलाई मतदानको व्यवस्था गर्नुपर्छ।

प्रवासी नेपालीका अभियानकर्ता र जेनजी अगुवाहरूले प्रवासी नेपालीहरुको मतअधिकार खोसिएको आरोप लगाउँदै सरकारलाई तत्काल कानुनी बाटो खोल्न दबाब बढाइरहेका छन्।