कुलमान घिसिङको नेतृत्वमा ‘उज्यालो नेपाल पार्टी’ जेन

कार्तिक २५, २०८२। राज नेपाली

काठमाडौं – पूर्वऊर्जा प्राधिकरणका कार्यकारी निर्देशक कुलमान घिसिङको नेतृत्वमा नयाँ राजनीतिक शक्ति ‘उज्यालो नेपाल पार्टी’ गठनको तयारी तीव्र बनेको छ। उक्त दलको संयोजक पूर्वऊर्जा सचिव अनुप उपाध्याय हुने र दलमा जेन–जी आन्दोलनका अगुवा सुधन गुरुङ, साथै काठमाडौंका मेयर बालेन्द्र शाहको टिम समेत समेटिने भएको छ।

निर्वाचन आयोगमा यसअघि नै दर्ता प्रक्रिया अघि बढेको ‘उज्यालो नेपाल पार्टी’लाई अब घिसिङ पक्षले आधिकारिक रूपमा अघि बढाउने निर्णय गरेको हो। पार्टीको चुनाव चिन्ह ‘बलिरहेको बिजुलीको चिम’ प्रस्ताव गरिएको छ।

उपाध्यायका अनुसार पार्टीले “एक व्यक्ति, एक पद” सिद्धान्त पालन गर्नेछ। यस अनुसार, मन्त्री रहेका घिसिङ अहिले पार्टीको कार्यकारी भूमिकामा नहुने तर सरकारबाट फिर्ता भएपछि अध्यक्षको जिम्मेवारी लिने अपेक्षा गरिएको छ।

कुलमान घिसिङ नेतृत्वमा ‘उज्यालो नेपाल’ अघि बढ्ने निर्णय

संयोजक: पूर्वऊर्जा सचिव अनुप उपाध्याय

जेन–जी नेता सुधन गुरुङ र मेयर बालेन्द्र शाहको टिम पनि समेटिने

सुमना श्रेष्ठले ‘जनसेवा पार्टी’ अलग रूपमा बनाउने तयारी

चुनाव चिन्ह: बलिरहेको बिजुलीको चिम

यसैबीच रास्वपा परित्याग गरेकी सुमना श्रेष्ठले भने ‘उज्यालो नेपाल’ नाममा असहमति जनाउँदै छुट्टै ‘जनसेवा पार्टी’ गठन गर्ने निर्णय गरेकी छन्। उनले ‘काउन्सिल अफ लिडर्स’ अवधारणामा आधारित नयाँ पार्टी अगाडि बढाउने बताएकी छन्।

उज्यालो नेपाल पार्टीमा सुधन गुरुङले घोषणा गरेका सातै प्रदेशका जेन–जी संयोजकहरू पनि सहभागी हुने भएका छन्। तीमध्ये कोशीका उपार्जुन चाम्लिङ, मधेशका शिव यादव, बागमतीकी अफ्साना बानु, गण्डकीका प्रदीप पाण्डे, लुम्बिनीका आदित्य आचार्य, कर्णालीकी सुप्रिया शाही र सुदूरपश्चिमका खेमराज साउद रहेका छन् ।

घिसिङ पक्षले आगामी निर्वाचनका लागि ५१ सदस्यीय केन्द्रीय समिति तयार गरि दल दर्ताको अन्तिम चरणमा पुगेको बताएको छ ।