कांग्रेसमा पुनः देउवा नेतृत्वको खोजी

कात्तिक २४, २०८२। राज नेपाली

काठमाडौँ – नेपाली कांग्रेसभित्र महाधिवेशन र निर्वाचनको अनिर्णयबीच सभापति शेरबहादुर देउवालाई पुनः सक्रिय बनाउने प्रयास तीव्र बनेको छ। पार्टीभित्र बढ्दो आन्तरिक असमझदारी र विभाजनको सम्भावनाले संस्थापन पक्षका मध्यमार्गी नेताहरू देउवाको नेतृत्वमा सहमतिमूलक समाधान खोजिरहेका छन्।

जेन–जी आन्दोलनपछि उपचारका लागि सिंगापुर गएका देउवाको अनुपस्थितिमा उपसभापति पूर्णबहादुर खड्काले कार्यवाहक जिम्मेवारी सम्हालेका छन्। तर पार्टीको केन्द्रीय कार्यसमिति बैठकले महाधिवेशनको स्पष्ट निर्णय नल्याउँदा कांग्रेस अलमलमा परेको छ।

स्रोतका अनुसार देउवा र एमाले अध्यक्ष केपी शर्मा ओलीबीच पछिल्ला राजनीतिक घटनाक्रमबारे संवाद भइरहेको छ। कांग्रेसभित्रका केही पूर्वसांसदहरूले प्रतिनिधिसभा पुनःस्थापनाको पक्षमा हस्ताक्षर सुरु गरेका छन् भने संस्थापनभित्रका सात पूर्वपदाधिकारीहरू भने आगामी निर्वाचनअघि महाधिवेशन नगर्ने अडानमा छन्।

मध्यमार्गी धारका नेताहरूले पुसको पहिलो साताभित्र नियमित महाधिवेशनको तालिका ल्याएर सहमतिको प्रयास गर्ने तयारी गरेका छन्। पार्टीमा गगन थापाको प्रभाव र सम्भावित नयाँ नेतृत्व उदयको डरले केही वरिष्ठ नेताहरू महाधिवेशन रोक्न चाहिरहेका छन्।

देउवाको स्वदेश फिर्तीसँगै कांग्रेसभित्र स्थिरता र सहमतिका प्रयास बलियो बन्ने संकेत देखिएको छ। तर यदि सहमति नजुटे पार्टीभित्र पुनः गम्भीर विभाजनको खतरा देखिएको विश्लेषकहरूको मत छ।