एपीएफ क्लब एएफसी महिला च्याम्पियन्स लिग छनोटमा नासाफसँग भिड्दै

भदौ ९, २०८२।

काठमाडौं – एएफसी महिला च्याम्पियन्स लिग छनोट चरण अन्तर्गत समूह बी को पहिलो खेलमा नेपालकी च्याम्पियन एपीएफ क्लबले आज उज्बेकिस्तानको पीएफसी नासाफसँग प्रतिस्पर्धा गर्दैछ। खेल क्वार्सीस्थित मार्काजिय स्टेडियम मा नेपाली समय अनुसार राती ९:१५ बजे सुरु हुनेछ।

एपीएफ टोलीलाई अनुभवी विङ्गर अनिता बस्नेत ले कप्तानी गर्नेछिन्। गत संस्करणमा पनि एपीएफ र नासाफ एउटै समूहमा परेका थिए, जहाँ एपीएफ १-० ले पराजित भएको थियो। यसपटक भने टिमले नयाँ रणनीति र बलियो प्रदर्शन गर्ने लक्ष्य लिएको छ।

यसै समूहमा रहेको थाइल्याण्डको कलेज अफ एसियन स्कोलार्स र साउदी अरेबियाको अल नासेर बीच पनि आजै अर्को खेल हुँदैछ।

यता एपीएफकी महत्वपूर्ण मिडफिल्डर प्रीति राई भने यस संस्करणमा अनुपस्थित छिन्, किनकि उनी हाल जोर्डनको इत्तिहाड क्लब सँग अनुबन्धमा छन्। प्रीतिको क्लबले समूह सी मा सिंगापुरको लायन सिटी विरुद्ध प्रतिस्पर्धा गर्नेछ।