एनआरएन विवाद : सुनुवाइ फेरि सरेपछि अन्योल कायमै

साउन २९, २०८२

कानकाठमाडौँ – गैरआवासीय नेपाली संघ (एनआरएनए) को आधिकारिकतासम्बन्धी विवादमा सर्वोच्च अदालतमा पेशी फेरि एक पटक सरेको छ।

बिहीबारका लागि तोकिएको सुनुवाइ फेरि पनि यसअघि निर्णय दिइसकेका न्यायाधीशको इजलासमा परेपछि मुद्दा हेर्न नमिल्ने भन्दै अर्को साता पुन: सर्ने भएको हो।

सर्वोच्च अदालतका न्यायाधीश नहकुल सुवेदी, टेकप्रसाद ढुंगाना र श्रीकान्त पौडेलको इजलासमा ‘ख’ नम्बरमा पेसी परे पनि सुवेदी र ढुंगानाले यसअघि नै एनआरएन निर्वाचनसम्बन्धी विवादमा निर्णय गरिसकेकोले मुद्दा हेर्न नमिल्ने देखिएको हो।

यो मुद्दा पछिल्ला महिनाहरूदेखि निरन्तर पेसीमा आइरहेको छ। यसअघि सर्वोच्चले शेष घले नेतृत्वको संयन्त्रमार्फत नयाँ निर्वाचन गराउन आदेश दिएको थियो। सोही आदेश अनुसार निर्वाचन तयारी भइरहेको बेलामा बद्री केसी र आरके शर्मा सर्वोच्च पुगेका थिए। अहिले पनि ६ वटा निवेदन मुद्दाका रूपमा कायम छन्।

केसीलाई परराष्ट्र मन्त्रालयले रोक लगाउने निर्णय सर्वोच्चले बदर गरे पनि घले समूहद्वारा सम्पन्न निर्वाचन र नयाँ अध्यक्ष महेश श्रेष्ठको चयनपछि विवाद झन् जटिल बनेको छ।

पूर्ण इजलासद्वारा सबै निवेदनको संयुक्त सुनुवाइ गर्ने प्रयास भइरहेको छ। तर हरेक बिहीबार मात्र तोकिने पूर्ण इजलासमा आज पनि सुनुवाइ सम्भव नभएपछि अर्को साता पुनः नयाँ इजलासमा पेशी तोकिनेछ।

यो पनि पढ्नुहोस् ।