राजनीतिक मुहान नै बिग्रिएको छ: कुलमानलाई ओलीको कडा प्रहार

मंसिर १६, २०८२। काठमाडौ दैनिक संवाददाता

काठमाडौं – देशमा बढ्दो राजनीतिक विचलन र अव्यवस्था प्रति गम्भीर चिन्ता व्यक्त गर्दै एमाले अध्यक्ष केपी शर्मा ओलीले वर्तमान नेतृत्वलाई कठोर आलोचना गरेका छन्। पार्टीको वन तथा वातावरण विभागको कार्यक्रममा बोल्दै उनले राजनीतिक संस्कार, आचरण र निर्णय–प्रक्रियामा आएको अवमूल्यनले राज्यको मूहानै बिग्रिएको जिकिर गरे।

ओलीले ‘उज्यालो नेपाल’ पार्टीप्रति व्यंग्य गर्दै फ्युज भएको चिमको प्रतीक प्रयोग गर्नु राजनीतिक अव्यवस्था र दिशाविहीनताकै प्रमाण भएको उल्लेख गरे। उनका अनुसार यस्ता गतिविधिहरूले मुलुकको मूल चरित्र नै कमजोर बनाइरहेको छ।

सरकार अराजकता र आगजनीको बाटोबाट बनेको दाबी गर्दै उनले यही कारण देश गलत मोडतर्फ धकेलिएको टिप्पणी गरे। अहिलेको सत्ता स्थिरता होइन, अस्थिरताको स्रोत बनेको छ, ओलीले भने। स्थिरतामा फर्किन संसद् पुनर्स्थापना नै एकमात्र उपाय भएको उनको अभिव्यक्ति थियो।

अवैध रूपमा गरिएको संसद् विघटनको प्रतिवाद गर्न नसक्ने अवस्थालाई उनले नेपाली डिक्सनेरीबाट सत्य शब्द हटाउनुपर्ने स्थिति बनेको बताए। राजनीतिक आचरणमा आएको विचलन र नेतृत्वको अनिर्णयले अस्थिरता थप गहिरिँदै गएको बताउँदै ओलीले अब राजनीतिक शुद्धिकरण अनिवार्य भएको निष्कर्ष निकाल्दै भने, जबसम्म राजनीतिक स्रोत स्वच्छ हुँदैन, तबसम्म देशले सही दिशा लिन सक्दैन।