जेनजी आन्दोलनमा भाटभटेनीमा जलेका १२ जनाको अझै पहिचान खुलेन

मंसिर ११, २०८२। काठमाडौँ दैनिक संवाददाता

काठमाडौ – जेन–जी प्रदर्शनका क्रममा २४ भदौमा भाटभटेनीका विभिन्न स्टोरमा फेला परेका १२ जलेका शवको अझै एकजनाको पनि पहिचान खुल्न सकेको छैन। कंकालसम्म जलेको अवस्थामा भेटिएका शवबाट डीएनए नमुना निकाल्न नसकिँदा अनुसन्धान पूर्णरूपमा रोकिएको छ।

काठमाडौं, मोरङ र सुनसरीका भाटभटेनी स्टोरको सफाइ गर्ने क्रममा ती शव भेटिएका हुन्। लिंग पहिचानसमेत गर्न नसकिने गरी जलेको प्रहरीको भनाइ छ।

काठमाडौं प्रहरी परिसरका एसपी पवनकुमार भट्टराईका अनुसार त्रिवि शिक्षण अस्पतालमा ल्याएर डीएनए परीक्षणका सबै प्रयास गरिए पनि कंकाल र खरानी दुवैबाट नमुना निकाल्न असफल भएको छ। अब यूरोपमा प्रयोग गरिने उन्नत विधिबारे छलफल भइरहेको उनले बताए।

सुनसरी र मोरङमा भेटिएका शव पनि खरानी जस्तै अवस्थामा रहेकाले पहिचानमा कुनै प्रगति छैन। मोरङमा भेटिएको शव भने नमुना संकलनपछि अन्त्येष्टि गरिएको छ।

आफन्तले हराएको निवेदन दिए पनि हुलिया मिल्ने आधार शून्य भएपछि अनुसन्धान अघि बढ्न सकेको छैन। भाटभटेनीले सो दिन स्टोर बन्द रहेको र कर्मचारी तथा ग्राहक नभएको पूर्वघोषणा गरिसकेको छ।

सामाजिक सञ्जालमाथि लगाइएको प्रतिबन्ध र भ्रष्टाचारविरुद्ध जेन–जीले २३ भदौमा सडकमा प्रदर्शन गरेका थिए। पहिलो दिन प्रहरीको अत्यधिक दमनबाट १९ जनाको मृत्यु भएपछि झन् आक्रोश बढ्यो र २४ भदौमा अझ बढी प्रदर्शनकारी सडकमा उत्रिए। दुवै दिनको घटनामा मृत्यु भएकाको संख्या ७६ पुगेको थियो भने २५ सय ७१ जना घाइते भएका थिए ।