दुर्गा प्रसाईं लक्षित मध्यरातको गिरफ्तार विवादमा डा. भिमार्जुन आचार्यको सरकारलाई प्रश्न

मंसिर ३, २०८२ काठमाडौं दैनिक संवाददाता

काठमाडौ – संविधानविद् डा. भिमार्जुन आचार्यले मेडिकल व्यवसायी दुर्गा प्रसाईंलाई मध्यरात घरमै घेराबन्दी गर्दै गरिएको गिरफ्तारीलाई ‘नागरिक शासनमा ठूलो धब्बा’ भएको बताएका छन्। उनले कानूनले रातको समयमा परिवारसँग रहेको व्यक्तिलाई गिरफ्तार गर्न नदिएको प्रष्ट उल्लेख गर्दै सरकारसँग किन यस्तो कदम चालियो ? भनेर जवाफ मागेका छन्।

सोमबार राति भक्तपुरस्थित निवासबाट प्रहरीले दुर्गा प्रसाईंलाई पक्राउ गरेको थियो। पक्राउ परेपछि डा. आचार्यले फेसबुकमार्फत प्रतिक्रिया सार्वजनिक गर्दै लेखेका छन्,
अभिव्यक्ति स्वतन्त्रताको सीमा हुन्छ। तर परिवारसँग बसिरहेको व्यक्तिलाई मध्यरातमा गिरफ्तार गर्नु कानूनत: बर्जित कार्य हो। यो नागरिक शासनको ठूलो धब्बा हो।

उनका अनुसार, अभिव्यक्ति स्वतन्त्रताको मर्यादाको निगरानी राज्यले गर्न सक्दछ तर ‘रातको गिरफ्तारी’ जस्ता कदमको कानुनी आधार सरकारले खुलाउनै पर्ने माग उनले राखेका छन्।

प्रसाईं पक्राउपछि काठमाडौं उपत्यकामा सुरक्षा व्यवस्था थप कडा बनाइएको छ। उनका समर्थक तथा नागरिक बचाउ समूहले विरोध प्रदर्शन गर्न सक्ने सम्भावना देखिएको प्रहरीले जनाएको छ।

प्रसाईंविरुद्ध ‘सार्वजनिक शान्तिविरुद्धको कसुर’मा चार दिनको म्याद पनि अदालतले थपिसकेको छ। पक्राउपछि उनलाई काठमाडौं प्रहरी परिसर भद्रकालीमा राखिएको छ।

डा. आचार्यले यसअघि पनि राजनीतिक विवाद, अभिव्यक्ति स्वतन्त्रता र नागरिक अधिकारसम्बन्धी विषयमा कडा प्रतिक्रिया दिँदै आएका छन्। यो पटक दुर्गा प्रसाईंको गिरफ्तारीले कानुनी विवाद मात्र होइन, राजनीतिक बहसलाई समेत चर्काएको देखिन्छ।