मधेश प्रदेशमा राजनीतिक तानातान : सभामुखविरुद्ध अविश्वास प्रस्ताव दर्ता

कात्तिक २७, २०८२। उपसना पौडेल

जनकपुरधाम – मधेश प्रदेशमा पुनः राजनीतिक तानातान तीव्र भएको छ। प्रदेशसभाका सभामुख रामचन्द्र मण्डलविरुद्ध सात राजनीतिक दलका सांसदहरूले अविश्वास प्रस्ताव दर्ता गर्न सचिवालय पुगेका छन्। तर सभामुख मण्डलले उक्त प्रस्ताव दर्ता नगर्न कर्मचारीलाई निर्देशन दिएको आरोप लाग्दै विवाद चुलिएको छ।

जसपा नेपालका प्रमुख सचेतक रामआशिष यादवका अनुसार ६४ जना सांसदहरूको हस्ताक्षरसहित अविश्वास प्रस्ताव लिएर पुगेका सांसदहरूलाई एमाले कार्यकर्ताले अवरोध गर्न खोजे पनि उनीहरू उपसभामुख बबिताकुमारी राउत ईशरको कार्यकक्षसम्म पुगेका थिए।

उपसभामुख राउतले उक्त प्रस्तावमा तोक लगाइसकेकी भए पनि सभामुखले सचिवालयमार्फत दर्ता रोकेका छन्। यादवका अनुसार “सभामुख मण्डलले आफूविरुद्धको प्रस्ताव रोक्न कर्मचारीलाई निर्देशन दिएका छन्, जुन स्पष्ट गैरसंवैधानिक कदम हो।

मधेश प्रदेश, सभामुख मण्डल, अविश्वास प्रस्ताव, जसपा नेपाल, बबिता राउत, एमाले, प्रदेश राजनीति, जनकपुरधाम समाचार — सभामुखविरुद्ध प्रस्ताव दर्ता गराउन पुगेका सात राजनीतिक दलका नेताहरू ।

गत शनिबार तत्कालीन मुख्यमन्त्री जितेन्द्र सोनलले विश्वासको मत लिने बेला सभामुख मण्डलले तटस्थ भूमिका नखेलेको भन्दै सात दलीय गठबन्धनले असन्तुष्टि व्यक्त गर्दै आएका थिए। सभामुख मण्डल एमाले कोटाबाट निर्वाचित भएकाले उनी पक्षपाती भएको आरोप गठबन्धनको छ।

प्रदेशसभा नियमावली अनुसार सभामुखविरुद्ध अविश्वास प्रस्ताव दुई तिहाई बहुमतले पारित गर्न सकिन्छ।