जेन जि आन्दोलनमा भएको क्षतिमा साढे २३ अर्ब बिमा दाबी

कार्तिक २५, २०८२। राज नेपाली

काठमाडौँ – गत भदौ २३ र २४ गते भएका आन्दोलन र प्रदर्शनका क्रममा भौतिक संरचनामा भएको क्षतिको बिमा दाबी साढे २३ अर्ब रुपैयाँ पुगेको छ । कात्तिक २४ सम्मको तथ्यांकअनुसार बिमा कम्पनीहरूले अहिलेसम्म केवल ३ अर्ब ६८ करोड ४१ लाख रुपैयाँ मात्र भुक्तानी गरेका छन् ।

बिमा प्राधिकरणका अनुसार हालसम्म ३ हजार २ सय ४६ वटा दाबी दर्ता भएका छन् । तीमध्ये १५.६९ प्रतिशत दाबीको मात्रै भुक्तानी गरिएको छ । बिमा कम्पनीहरूले ठूला क्षतिको मूल्यांकन तथा प्रक्रियागत ढिलाइका कारण भुक्तानीमा समय लागेको बताएका छन् ।

सबैभन्दा धेरै भुक्तानी सम्पत्ति बिमा (घर तथा भवन) अन्तर्गत गरिएको छ । यस शीर्षकमा ६ सय ९३ दाबीमा २ अर्ब ९२ करोड ८६ लाख रुपैयाँ भुक्तानी भएको छ । त्यसपछि मोटर बिमा ६८ करोड ६१ लाख, ठेकेदार तथा इन्जिनियरिङ बिमा ६ करोड २२ लाख, पारवहन बिमा ४७ लाख र अन्य बिमा २३ लाख रुपैयाँ बराबरको भुक्तानी गरिएको छ ।

बिमा कम्पनीहरूले ठूला क्षतिको मूल्यांकन र सरकारी निकायबाट आवश्यक विवरण नआएकाले बाँकी दाबी भुक्तानी प्रक्रिया सुस्त भएको जनाएका छन् ।

कुल बिमा दाबी: रु २३ अर्ब ४६ करोड ९१ लाख

हालसम्मको भुक्तानी: रु ३ अर्ब ६८ करोड ४१ लाख (१५.६९%)

कुल दाबी संख्या: ३,२४६ वटा

सबैभन्दा धेरै भुक्तानी: सम्पत्ति बिमा रु २.९२ अर्ब

बिमा क्षेत्रका विज्ञहरूका अनुसार ठूलो परिमाणको क्षति मूल्यांकन र भौतिक प्रमाण संकलनमा ढिलाइ हुँदा बिमा भुक्तानी प्रक्रिया प्रभावित भएको हो । प्राधिकरणले बिमा कम्पनीहरूलाई छिटो मूल्यांकन र दाबी भुक्तानी पूरा गर्न निर्देशन दिएको जनाएको छ ।