ओलीको एजेन्डामा कांग्रेसको साथ : संसद पुनर्स्थापनाको हस्ताक्षर अभियानले नयाँ राजनीतिक तरंग

कार्तिक २३, २०८२। राज नेपाली

काठमाडौं – प्रतिनिधि सभा विघटन भएको दुई महिनापछि नेपाली कांग्रेसका निवर्तमान सांसदहरूले पनि पुनर्स्थापनाको मागसहित हस्ताक्षर अभियान थालेका छन्। सुरुवातमा निर्वाचनको पक्षमा रहेको कांग्रेसभित्र यो कदमले एमालेको एजेन्डालाई बल पुर्‍याएको विश्लेषण भइरहेको छ।

एमालेले संसद पुनर्स्थापनाको माग अघि सार्दै सडक आन्दोलनको तयारी गरिरहेको बेला कांग्रेसभित्रका केही सांसदहरूले सर्वोच्च अदालतमा रिट दर्ताका लागि हस्ताक्षर अभियान सुरू गरेका छन् ।

कांग्रेसका प्रमुख सचेतक श्यामकुमार घिमिरेको अगुवाइमा सुरु भएको अभियानको उद्देश्य अदालतमा “हामी पीडित हौं” भन्ने देखाउन भएको बताइएको छ। सिग्नेचर पार्टीमा बुझाउँछौं, तर निर्णय पार्टीकै एकताको आधारमा होस् भन्ने हाम्रो आग्रह हो, घिमिरेले भने।

नेपाली कांग्रेसले अहिलेसम्म संसद पुनर्स्थापनाबारे कुनै संस्थागत निर्णय गरेको छैन। पार्टीभित्रको मतभिन्नताका कारण यो कदमलाई संस्थापन र असन्तुष्ट पक्षबीचको नयाँ शक्ति परीक्षणको रूपमा हेरिएको छ।

यता एमाले अध्यक्ष केपी शर्मा ओलीले पहिले नै पुनर्स्थापनाको मागलाई पार्टीको आधिकारिक एजेन्डा बनाएर आन्दोलन घोषणा गरिसकेका छन्। एमाले र कांग्रेस दुवैका सांसदहरूले अदालतमा पेश गर्न हस्ताक्षर संकलन गरिरहेका छन्।

राजनीतिक विश्लेषकहरूको भनाइमा, जेनजी आन्दोलनपछिको राजनीतिक भावनासँग मेल नखाने गरी पुनर्स्थापनाको प्रयासले मुलुकमा नयाँ राजनीतिक संकट निम्त्याउन सक्ने खतरा छ। तर समर्थकहरू भने यो संविधान र लोकतन्त्रको पुनःस्थापनाको प्रयास भएको तर्क गर्छन्।