झापा महिला गोल्डकप फाइनल: पुलिस र एपिएफ उपाधिका लागि भिड्दै, १० लाखको ट्रफी दाबी

कार्तिक २३, २०८२। उपसना पौडेल

झापा महिला गोल्डकपको फाइनलमा विभागीय भिडन्त: पुलिस र एपिएफ उपाधि यात्रामा आमनेसामने

बिर्तामोड – झापाको शिवसताक्षी नगरपालिका–स्थित दुधे रंगशालामा सोमबारदेखि सुरु हुने एलभिडी झापा महिला गोल्डकप फुटबल प्रतियोगिताको फाइनलमा दुई विभागीय टिम एपिएफ फुटबल क्लब र नेपाल पुलिस क्लब फाइनल उपाधिका लागि भिड्ने भएका छन्।

आइतबार आयोजित प्रि–म्याच कन्फ्रेन्समा दुवै टोलीका प्रशिक्षक र कप्तानहरूले आफ्नो टोली उपाधिका लागि पूर्ण तयारी अवस्थामा रहेको बताएका थिए।

एपिएफका प्रशिक्षक जिवेश पाण्डेले भने, हाम्रो टोलीले अहिलेसम्म कुनै फाइनलमा हार व्यहोरेको छैन, यसपटक पनि उपाधि रक्षा गर्ने आत्मविश्वास छ।” कप्तान अनिता बस्नेतले थपिन्, एपिएफ सधैँ ट्रफीका लागि खेल्छ, झापामा पनि उपाधि थप्ने लक्ष्य छ।

पुलिसका प्रशिक्षक भोला सिलवालले भने, रेखा पौडेल र पूजा राना मगरको तालमेलले टोलीलाई मजबुत बनाएको छ। यो पटक हामी एपिएफलाई पराजित गर्दै उपाधि जित्नेछौँ।
त्यस्तै कप्तान अमृता जैशीले विगतका पराजयको बदला लिने दृढता व्यक्त गर्दै भनिन्, झापामै हामी एपिएफसँगको हारको हिसाब बराबर गर्दै ट्रफी लिएर फर्किनेछौँ।

एपिएफ महिला फुटबलमा सधैं बलियो टोलीको रूपमा चिनिँदै आएको छ। देशका धेरै राष्ट्रिय प्रतियोगितामा उपाधि जित्ने इतिहास रहेको एपिएफले फाइनलमा कहिल्यै हार व्यहोरेको छैन।

त्यस्तै नेपाल पुलिस क्लबले पछिल्लो समय अनुभवी खेलाडी रेखा पौडेल र पूजा राना मगरको पुनरागमनपछि बलियो टोली तयार पारेको छ।

सोमबार दिउँसो २ः३० बजे हुने फाइनल खेलमा झापाका फुटबलप्रेमीहरूको उल्लेख्य उपस्थिति रहने अपेक्षा गरिएको छ। आयोजकका अनुसार सामान्य टिकटको दर रु. ३०० र ५०० तथा भिआइपीका लागि रु. १,००० तोकिएको छ।

विजेता टोलीले १० लाख १० हजार रुपैयाँ, उपविजेताले ५ लाख रुपैयाँ पुरस्कार पाउनेछन्।
त्यस्तै उत्कृष्ट खेलाडीलाई १ लाख ५० हजार रुपैयाँ, र उत्कृष्ट गोलकिपर, डिफेन्डर, मिडफिल्डर, फरवार्ड, उदीयमान खेलाडी, प्रशिक्षक र उच्च गोलकर्ताले जनही २५ हजार रुपैयाँ पुरस्कार प्राप्त गर्नेछन्।

झापाको दुधे रंगशाला सोमबार देशका शीर्ष महिला खेलाडीहरूको निर्णायक भिडन्तको साक्षी बन्नेछ।