मानुषी लघुवित्त नाफामा फर्कियो, प्रतिसेयर आम्दानी धनात्मक

कार्तिक २३, २०८२। राज नेपाली

मानुषी लघुवित्त, Manushi Laghubitta, EPS धनात्मक, नाफा रिपोर्ट, लघुवित्त नाफा, अर्थ संसार, शेयर बजार, वित्तीय संस्था, आर्थिक समाचार

काठमाडौं – गत आर्थिक वर्षको सुरुवाती तीन महिनामा घाटा खेपेको मानुषी लघुवित्त वित्तीय संस्था लिमिटेड चालू आर्थिक वर्षको सोही अवधिमा नाफामा फर्किएको छ। कम्पनीले ४२ लाख ९१ हजार रुपैयाँ खुद नाफा कमाउँदै प्रतिसेयर आम्दानी (EPS) पनि धनात्मक बनाएको छ।

गत आवको असोज मसान्तसम्म कम्पनीको EPS ऋणात्मक २०.५४ रुपैयाँ रहेकोमा यस आवमा सोही सूचक १५.६९ रुपैयाँ धनात्मक भएको छ। साथै, सञ्चालन नाफा ५६ लाख १६ हजार घाटाबाट उक्लिएर ६१ लाख २७ हजार रुपैयाँ नाफामा पुगेको कम्पनीले जनाएको छ।

समीक्षा अवधिमा कम्पनीको कुल सञ्चालन आम्दानी ३ करोड ३६ लाख ९० हजार रुपैयाँ पुगेको छ, जुन गत वर्षको तुलनामा वृद्धि हो। तर खुद ब्याज आम्दानी भने २ करोड ५९ लाख ९२ हजारबाट घटेर २ करोड ४३ लाख ६९ हजार रुपैयाँमा झरेको छ।

कम्पनीको खराब कर्जा ५.१३% बाट बढेर ६.१४% पुगेको छ भने प्रतिशेयर नेटवर्थ १३३.६६ रुपैयाँ कायम छ। मानुषीको चुक्ता पुँजी १० करोड ९३ लाख ७५ हजार रुपैयाँ रहेको छ। रिजर्भ कोषमा ५ करोड ७३ लाख रुपैयाँ धनात्मक र जगेडा कोषमा २ करोड ४ लाख ९४ हजार रुपैयाँ ऋणात्मक छ।

हाल कम्पनीले १ अर्ब ४१ करोड ४७ लाख रुपैयाँ कर्जा प्रवाह गरेको र १ अर्ब १२ करोड ५४ लाख रुपैयाँ निक्षेप संकलन गरेको छ।