रास्वपाले रूपन्देही उपनिर्वाचन उमेदवार घोषणा गर्दै, ९ आकांक्षीले रविलाई भेट्दै

भदौ १५, २०८२।

काठमाडौँ – राष्ट्रिय स्वतन्त्र पार्टी (रास्वपा) ले आज केन्द्रीय सचिवालय बैठक डाकेको छ। दिउँसो साढे १ बजे पार्टी कार्यालय बनस्थलीमा बस्ने बैठकमा रूपन्देही–३ उपनिर्वाचनका लागि उम्मेदवार छनोट, मूल्यांकन र प्रवास विशेष अभियान सञ्चालनबारे छलफल हुने बताइएको छ।

बैठक सकिएलगत्तै रास्वपाले उम्मेदवार घोषणा गर्ने तयारी गरेको छ। यसपटक रूपन्देही–३ बाट उम्मेदवारीका लागि ९ जना आकांक्षी छन्। शुलभ खरेल, पार्थिवेन्द्र उपाध्याय, डा. लेखजंग थापा, ज्ञानु पौडेल, जितबहादुर गुप्ता, कुसुम महर्जन, रचना क्षेत्री, पुनकुमारी अग्रवाल र मधुप्रसाद अर्याल आकांक्षी सूचीमा रहेका छन्।

बैठकअघि नै यी आकांक्षीहरू पार्टी सभापति रवि लामिछानेलाई भेट्न नख्खु कारागार गएका छन्। बिहान ११ बजे सामूहिक भेटघाट कार्यक्रम तय भएको छ।

रुपन्देही-३ बाट प्रतिनिधिसभामा निर्वाचित राप्रपा सांसद दीपक बोहोराको निधन भएकाले सो स्थानमा कात्तिक १७ गते उपनिर्वाचन हुँदै छ ।