दुर्गा प्रसाईंलाई २८ लाख धरौटीमा रिहा गर्न उच्च अदालतको आदेश

साउन १९, २०८२।

काठमाडौं – तीनकुने प्रकरणमा संलग्न रहेका व्यवसायी दुर्गा प्रसाईंलाई धरौटीमा रिहा गर्न उच्च अदालत पाटनले आदेश दिएको छ। न्यायाधीश टंकप्रसाद गुरुङ र डिल्लीरत्न श्रेष्ठको संयुक्त इजलासले तीन लाख रुपैयाँ धरौटीमा प्रसाईंलाई रिहा गर्न निर्देशन दिएको हो।

प्रसाईंमाथि बैंकिङ कसुरसम्बन्धी अर्को मुद्दा पनि दर्ता भएको छ, जसमा न्यायाधीश सुदर्शनदेव भट्ट र मुनेन्द्रप्रसाद अवस्थीको इजलासले २५ लाख रुपैयाँ धरौटी माग गरेको छ। सोअनुसार दुई मुद्दाको धरौटी रकम जोड्दा प्रसाईंलाई २८ लाख रुपैयाँ धरौटी तिर्नुपर्नेछ।

अदालतले प्रसाईंसँगै थुनामा रहेका अन्य तीन अभियुक्तलाई पनि धरौटीमा रिहा गर्न आदेश दिएको छ। सुशील बराल र तारा राजावादी भनिने सरोज गौतमलाई जनही ५० हजार रुपैयाँ धरौटीमा रिहा गर्न तथा दण्डपाणि रेग्मीलाई १० हजार धरौटीमा छाड्न आदेश दिइएको हो।

गत चैत १५ गते राजसंस्थाको पुनर्स्थापनाको माग गर्दै काठमाडौंको तीनकुनेमा भएको प्रदर्शन हिंसात्मक बनेपछि प्रहरीले अश्रुग्यास र गोली प्रहार गरेको थियो। त्यस क्रममा सबिन महर्जन र पत्रकार सुरेश रजकको मृत्यु भएको थियो भने करिब २० जना घाइते भएका थिए।

प्रदर्शनका क्रममा जडिबुटीमा रहेको सरकारी प्रशोधन केन्द्रमा आगजनी र कोटेश्वरस्थित भाटभटेनी सुपरमार्केटमा लुटपाट पनि भएको थियो। प्रहरीले सो घटनामा संलग्न भन्दै प्रसाईंसहित अन्यलाई पक्राउ गरेको थियो।