गाजामा युद्धविराम अस्वीकार : ‘पूर्ण प्यालेस्टीनी राज्य’ नभएसम्म हमासले हतियार नछोड्ने

साउन १९, २०८२। एजेन्सी

जेरुसेलम – गाजामा जारी संघर्षलाई रोक्न इजरायलले अघि सारेको निशस्त्रीकरणको प्रस्ताव हमासले स्पष्ट रूपमा अस्वीकार गरेको छ। हमासले सार्वजनिक विज्ञप्ति जारी गर्दै भनेको छ “पूर्ण सार्वभौमसहितको स्वतन्त्र प्यालेस्टीनी राज्य” स्थापनासम्म लडाइँ रोकिदैन र हतियार बिसाइँदैन।

यस भनाइले इजरायल र हमासबीच युद्धविरामको सम्भावनालाई थप जटिल बनाएको छ। हालै अमेरिकी पूर्वदूत स्टिभ विटकफले हमास हतियार त्याग्न इच्छुक भएको टिप्पणी गरेपछि हमासले यसलाई खारेज गर्दै इजरायलको शर्त स्वीकार्य नहुने बताएको हो।

इजरायलले युद्ध अन्त्यका लागि हमासको निशस्त्रीकरणलाई मुख्य सर्तको रूपमा राख्दै आएको छ। तर, गत साता हमास र इजरायलबीच भइरहेको अप्रत्यक्ष वार्ता अवरुद्ध भएको थियो।

फ्रान्स, क्यानडा जस्ता पश्चिमा राष्ट्रहरूले प्यालेस्टीनी राज्यको मान्यता दिने संकेत दिएपछि अरब देशहरू पनि सक्रिय छन्। ती देशहरूले हमासलाई गाजाको नियन्त्रण त्याग्न र हतियार बिसाउन सुझाव दिएका छन्। ब्रिटेनले पनि सेप्टेम्बरसम्म इजरायलले आफ्ना शर्तहरू नमान्दा प्यालेस्टीनी राज्यको मान्यता दिने बताएको छ।

यता इजरायल डिफेन्स फोर्स (IDF) का प्रमुख इयाल जमिरले चेतावनी दिँदै भने “हमासले बन्धकहरू नछाडे युद्ध अझ चर्किनेछ। शनिबार हमासले एक इजरायली बन्धक एम्यातार डेभिडको भिडियो सार्वजनिक गरेपछि बन्धक परिवारले सरकारसँग उद्धारको माग गरेका छन्।

भिडियोमा एम्यातार एक अँध्यारो सुरुङमा भोकभोकै, बिना कपडा देखिएका छन्। उनको परिवारले विज्ञप्ति जारी गर्दै हमासले बन्धकलाई प्रोपागान्डाको साधनका रूपमा प्रयोग गरिरहेको आरोप लगाएको छ। साथै उनीहरूले इजरायली तथा अमेरिकी सरकारलाई दबाब सिर्जना गर्दै बन्धकको जीवनरक्षाको लागि सक्दो पहल गर्न अपिल गरेका छन्।