असार १५, २०८२ । काठमाडौं दैनिक संवाददाता
नेपाली खेलकुदको इतिहासमा आइतबारको दिन विशेष साबित भएको छ। उज्वेकिस्तानमा जारी दुई भिन्न खेल प्रतियोगितामा नेपाली युवा तथा महिला टोलीले उत्कृष्ट प्रदर्शन गर्दै देशको खेलप्रतिकाे उन्नतिको स्पष्ट सन्देश दिएको छ।
एकातर्फ महिला राष्ट्रिय फुटबल टोलीले एएफसी महिला एसियन कप छनोटमा लाओसलाई ९–० ले पराजित गर्यो भने अर्कोतर्फ यु–१६ क्रिकेट टोलीले इन्डोनेसियामाथि ३७० रनको ऐतिहासिक जित दर्ता गर्दै सेमिफाइनलमा स्थान बनाउन सफल भएको छ ।
एएफसी महिला एसियन कप छनोट प्रतियोगिता अन्तर्गत नेपालले आइतबार उज्वेकिस्तानमा भएको खेलमा लाओसविरुद्धको खेलमा ९-० को सानदार जित हासिल गर्यो।
नेपालका लागि पहिलो पटक कप्तानी गरिरहेकी सावित्रा भण्डारी (साम्बा) ले ४ गोल गरेकी थिइन्। उनले कप्तानको जिम्मेवारीमा देखाएको आक्रमणात्मक शैलीले दर्शकको मन जितेकी छिन् । अन्य खेलाडीहरूको सहभागिता पनि सशक्त रह्यो, जसमा अवसर सिर्जना गर्ने भूमिकामा उल्लेखनीय योगदान दिए।
यो खेल समुह ‘एफ’ अन्तर्गतको पहिलो खेल थियो, जहाँ नेपालसहित उज्वेकिस्तान, लाओस र श्रीलंकाले भाग लिएका छन्। समूहको शीर्ष स्थानमा रहने टोलीले आगामी एसियन कपको छनोट चरणमा स्थान बनाउनेछ।
शनिबार आयोजना भएको प्रि–म्याच कन्फ्रेन्समा सहभागी चारै राष्ट्र (उज्वेकिस्तान, नेपाल, लाओस र श्रीलंका) ले ‘छनोट’ नै आफ्नो प्रमुख लक्ष्य रहेको घोषणा गरेका थिए। नेपाली टोलीको यो प्रदर्शनले टोली छनोट समीकरणमा बलियो प्रतिस्पर्धी बन्ने संकेत दिएको छ।
समूहको दोस्रो खेलमा नेपालले आयोजक उज्वेकिस्तानको सामना गर्नेछ, जुन सम्भवतः समूहको निर्णायक खेल बन्ने देखिन्छ। प्रशिक्षक नवीन न्यौपानेका अनुसार, नेपालले आगामी खेलमा पनि रणनीतिक संयोजन जारी राख्नेछ।
उज्वेकिस्तानमै जारी एसीसी यु–१६ इस्टजोन कप क्रिकेटमा नेपालले आइतबार इन्डोनेसियामाथि ३७० रनको ऐतिहासिक जित दर्ता गर्दै प्रतियोगिताको सेमिफाइनलमा स्थान सुरक्षित गरेको छ।
नेपालले पहिला ब्याटिङ गर्दै ५० ओभरमा ४२० रन बनाएको थियो। यो स्कोर बनाउन प्रसिद्ध श्रेष्ठको शतक मुख्य कारण बन्यो। उनले १०५ रन बनाएका थिए भने साथ दिएका अन्य ब्याट्सम्यानहरूले पनि आक्रामक प्रदर्शन गरे।
इन्डोनेसियाले जवाफी ब्याटिङमा जम्मा ५० रनमै समर्पण गर्नुपर्यो। नेपाली बलरहरूको घातक स्पेलमा विपक्षी टोली एकपछि अर्को गरी पेविलियन फर्किएको दृश्य दर्शनीय रह्यो।
यो जित नेपालका लागि प्रतियोगिताको लगातार तेस्रो जित थियो। यसअघि, नेपालले म्यानमार र सिंगापुरविरुद्ध सहज जित दर्ता गरिसकेको छ।
नेपालका उदयीमान क्रिकेटर प्रसिद्ध श्रेष्ठले यस खेलमा आफ्नो क्षमताको प्रमाण दिँदै १०५ रनको शानदार इनिङ खेले। उनी राष्ट्रिय टोलीको भविष्यका सम्भावित स्तम्भ मानिन्छन्।
उनले ७२ बलमा १४ चौका र ३ छक्काको मद्दतले रन बनाएका थिए। कप्तान सरोज आचार्यले समेत ७५ रन बनाउँदै टोलीलाई विशाल स्कोरमा पुर्याएका थिए।
नेपालले दिएको ४२१ रनको लक्ष्य पछ्याउने क्रममा इन्डोनेसियाले सुरूवातदेखि नै विकेट गुमाउँदै गयो। बलर अमित लामा र यश थापाले समान ३/३ विकेट लिए। बायाँ हाते स्पिनर अर्जुन चौलागाईंले पनि २ विकेट लिए।
यस्ता प्रतियोगिताहरूले नेपालमा खेलकुद संस्कृतिको विकास र युवा प्रतिभाको उत्साहलाई प्रश्रय दिएको छ ।
महिला फुटबल र यु-१६ क्रिकेट दुबैमा देखिएको उत्कृष्टता भविष्यका लागि सकारात्मक संकेत हुन्।
पूर्व प्रशिक्षक हरि खड्का भन्छन्, “यसरी अन्तर्राष्ट्रिय स्तरमा जित हात पार्नु नेपाली खेलकुदको समृद्धि र भविष्य उज्यालो बनाउने खाका हो।
त्यति मात्र होइन, थाइल्यान्ड ओपन कराते प्रतियोगितामा नेपाली खेलाडी एरिका गुरुङले स्वर्ण पदक जितेर अर्को खुशीको खबर थपिन्। युवा खेलाडीहरूमध्ये थुप्रैले पदक जितेर अन्तर्राष्ट्रिय मंचमा नेपालको झण्डा फहराएका छन् ।
नेपालको खेलकुद इतिहासमा असार १५, २०८२ एक ऐतिहासिक दिनका रूपमा याद रहनेछ। फुटबल, क्रिकेट, कराते — तीनवटै क्षेत्रमा नेपाली खेलाडीहरूले देशलाई गौरवान्वित तुल्याएका छन् ।
