सुरक्षा समितिको बैठकमै प्रसाईंलाई पक्राउ गर्ने निर्णयमा पुगेको खुलासा

मंसिर २, २०८२। काठमाडौं दैनिक संवाददाता

काठमाडौँ – गृहमन्त्री ओमप्रकाश अर्यालले आइतबार बोलाएको सुरक्षा समिति बैठकमै दुर्गा प्रसाईंलाई नियन्त्रणमा लिनेबारे गम्भीर छलफल भएको खुलेको छ। आगामी निर्वाचनलाई लक्षित गरी तयार गरिएको एकीकृत सुरक्षा योजनामा सुरक्षा निकायले प्रसाईंका पछिल्ला अभिव्यक्तिले देशभर अस्थिरता र त्रास फैलिन सक्ने चिन्ता व्यक्त गरेपछि पक्राउको दिशामा प्रक्रिया अगाडि बढाइएको थियो।

बैठकमा नेपाल प्रहरीका प्रमुख आईजीपी दानबहादुर कार्की, सशस्त्र प्रहरीका प्रमुख राजु अर्याल तथा राष्ट्रिय अनुसन्धान विभागका प्रमुख टेकेन्द्र कार्कीले प्रसाईंका अभिव्यक्तिहरू हिंसा भड्काउने खालका रहेको भन्दै तत्काल कानुनी दायरामा ल्याउन सुझाएका थिए।

विशेषगरी दूतावासमा बम पड्काएर आफूतिर आरोप लगाइदिन सक्छन्’ तथा ‘देशै ठप्प हुन्छ’ जस्ता अभिव्यक्तिले समाजमा अनावश्यक भय फैलिएको सुरक्षा संयन्त्रले निष्कर्ष निकालेको थियो।

बैठकले नाम नखुले पनि हिंसा भड्काउने, जनतालाई आतंकित पार्ने गतिविधिमा संलग्न जो–कसैलाई कडा कारबाही गर्ने निर्णय गरेको थियो। मन्त्रालयका एक अधिकारीका अनुसार यो निर्णय प्रत्यक्ष रूपमा प्रसाईंलाई लक्षित थियो।

यसअघि गृह मन्त्रालयमा प्रसाईं समूहले २६ बुँदे मागपत्र पेस गर्दै ७ मंसिरदेखि आन्दोलन चर्काउने घोषणा गरेको थियो। शान्तिपूर्ण आन्दोलनको प्रतिबद्धता व्यक्त गरे पनि प्रसाईंले सामाजिक सञ्जाल र सार्वजनिक कार्यक्रममा निरन्तर रूपमा उत्तेजनापूर्ण अभिव्यक्ति दिँदै आएका थिए।

यही कारण प्रहरीले सोमबार राति भक्तपुरस्थित उनको निवासमै पुगेर उनलाई नियन्त्रणमा लिएको हो। कडा सुरक्षाबीच उपत्यका प्रहरी र काठमाडौं प्रहरी परिसरको संयुक्त टोलीले उनलाई भद्रकालीस्थित हिरासतमा राखेको छ। उनीविरुद्ध कुन कानुनी धारामा प्रक्रिया अघि बढाउने भन्नेबारे अन्तिम टुंगो लागेको छैन। सरकारी वकिलसँगको सल्लाहपछि म्याद थपका लागि मंगलबार अदालत लैजाने तयारी भइरहेको प्रहरीले जनाएको छ।

प्रसाईंले सोमबार दिउँसोसम्म आफू ‘स्वेच्छाले गिरफ्तारी दिन तयार’ रहेको दाबी गरे पनि राति प्रहरीले जबरजस्ती पक्राउ गर्नुपरेको बताइएको छ। उनले आगामी आन्दोलनमा भीड उतार्ने रणनीति बनाइरहेको सुराकी तथा अभिव्यक्तिहरूले सुरक्षा निकायलाई सतर्क बनाएको एक अधिकारीले बताए।