सर्लाहीमा गोली प्रहारबाट शिक्षकको हत्या, एक अभियुक्त पक्राउ

साउन ३१, २०८२।

सर्लाही – सर्लाही जिल्लाको हरिपुर्वा नगरपालिका–६ मा अज्ञात समूहद्वारा गोली प्रहार गरी एक शिक्षकको हत्या गरिएको छ। गोली लागेर गम्भीर घाइते भएका शिक्षक रामपुकार यादवको उपचारका क्रममा बाटोमै निधन भएको हो। घटनापछि एक जना पक्राउ परेका छन् भने अन्य संलग्न व्यक्तिहरू फरार छन्।

प्रहरीका अनुसार राति करिब साँढे ८ बजेतिर यादवमाथि गोली प्रहार गरिएको थियो। स्थानीयवासी र प्रहरीको सहयोगमा उनलाई तत्कालै महोत्तरीको रामगोपालपुरस्थित जानकी एकेडेमिक अस्पतालतर्फ लैजाँदै गर्दा बाटोमै उनको मृत्यु भएको डाक्टरहरूले पुष्टि गरेका छन्।

घटनास्थलबाट मोटरसाइकलमा भाग्दै गरेका व्यक्तिहरू दुर्घटनामा परेका थिए, जसमा एक जना पक्राउ परेका छन्। सो व्यक्ति अहिले प्रहरी नियन्त्रणमा छन् भने अरू अभियुक्तहरूको खोजी कार्य जारी रहेको जिल्ला प्रहरी कार्यालय सर्लाहीले जनाएको छ।

शिक्षक यादवको मृत्युले स्थानीय क्षेत्र शोकमा डुबेको छ। उनका सहकर्मी, विद्यार्थी र स्थानीयबासीले दोषीलाई कडा कारबाहीको माग गरेका छन्। घटना के कारणले भयो भन्नेबारे अनुसन्धान भइरहेको प्रहरीले जनाएको छ