मधेश युनाइटेडको मार्की खेलाडीमा निरुताको पुनः नियुक्ति गरेको छ।
काठमाडौं, साउन २- राष्ट्रिय महिला भलिबल टोलीकी अनुभवी स्पाइकर निरुता ठगुन्ना पुनः एकपटक मधेश युनाइटेडबाट खेल्ने भएकी छन्। एभरेष्ट महिला भलिबल लिग (इडब्लुभिएल) को दोस्रो संस्करणका लागि उनलाई मार्की खेलाडीको रूपमा निरन्तरता दिइएको हो।
निरुताले मधेश युनाइटेडबाट पुनः अनुबन्धित हुनु आफ्नो लागि गर्वको विषय भएको बताउँदै भनिन्, “टिमलाई विजेता बनाउने लक्ष्यसहित म मैदानमा उत्रिनेछु।
मधेश युनाइटेडका अनुसार निरुताको बलियो नेतृत्व, अनुभव र प्रहार क्षमताले टोलीलाई पहिलो संस्करणमै सशक्त बनाएको थियो, र यही कारणले उनलाई फेरि पनि टोलीमा समेटिएको हो।
मधेश युनाइटेडले यसअघि कोपिला उप्रेतीलाई मुख्य प्रशिक्षकको रूपमा अनुबन्ध गरिसकेको छ। यस्तै, आजै चर्चित अभिनेत्री नीति शाहलाई टोलीको ब्रान्ड एम्बेसडरको रूपमा सार्वजनिक गरिएको छ। यसले क्लबको लोकप्रियता र पहिचानमा थप ऊर्जा दिने अपेक्षा गरिएको छ ।
इन्फिनिटी ड्रिम्स प्रा.लि.को आयोजनामा हुन लागेको दोस्रो संस्करणको इडब्लुभिएल भदौ २० गतेदेखि २८ गतेसम्म सञ्चालन हुने तय भएको छ। खेलाडी अक्सन भने साउन ३ गते हुने बताइएको छ, जसमा देशभरका दर्जनौं उत्कृष्ट महिला खेलाडीहरू सहभागी हुनेछन्।
निरुताको अनुभव र मधेश युनाइटेडको योजनाबद्ध तयारीले इडब्लुभिएलको दोस्रो संस्करणमा टीमले अझै बलियो प्रदर्शन गर्ने संकेत देखिएको छ। साथै, महिला भलिबलको समग्र प्रवर्द्धन र प्रतिस्पर्धात्मकता बढाउने यो एक महत्वपूर्ण पाइलाका रूपमा हेरिएको छ।
