काठमाडौं, साउन १२ – प्रधानमन्त्री केपी शर्मा ओलीले भक्तपुरको सूर्यविनायक नगरपालिका अन्तर्गतको जगाती क्षेत्रमा ५० हजार दर्शक अट्ने क्षमताको आधुनिक रंगशाला निर्माणको योजना अघि सारेका छन्। यो योजना अन्तर्गत सोमबार प्रधानमन्त्री ओलीले सम्बन्धित सरोकारवालाहरूसँग विशेष छलफल गरेका छन्।
छलफलमा सूर्यविनायक नगरपालिकाका प्रमुख, राष्ट्रिय खेलकुद परिषद् (राखेप) तथा अखिल नेपाल फुटबल संघ (एन्फा) का उच्च पदाधिकारीहरू सहभागी थिए। प्रधानमन्त्रीको पहलमा भएको यस संवादमा जग्गा प्राप्ति, संरचना निर्माण र आवश्यक पूर्वाधार विकासका विषयमा गहन विचारविमर्श भएको थियो।
प्रधानमन्त्री ओलीले सामाजिक सञ्जालमार्फत जानकारी दिँदै दशरथ रंगशाला वर्तमान खेलकुद आवश्यकता पुरा गर्न पर्याप्त नभएको भन्दै देशकै आवश्यकता अनुरूप नयाँ र विशाल रंगशाला निर्माण अपरिहार्य भएको उल्लेख गरेका छन्। उनका अनुसार, नयाँ रंगशालाले अन्तर्राष्ट्रिय स्तरका प्रतियोगिता सञ्चालन गर्न तथा नेपाली खेलकुदको दीर्घकालीन विकासमा योगदान पुर्याउनेछ।
प्रधानमन्त्री ओलीले केही दिनअघि सार्वजनिक कार्यक्रममा समेत जगातीमा रंगशाला निर्माणको घोषणा गरेका थिए। उक्त घोषणालाई मूर्त रूप दिन प्रारम्भिक तयारी सुरु भएको संकेत यस छलफलले दिएको छ।
भक्तपुरको भौगोलिक अवस्थिति, उपत्यकासँगको नजिकको दूरी, पहुँच र पर्यटकीय सम्भावनालाई ध्यानमा राख्दै जगातीलाई रंगशाला निर्माणको उपयुक्त स्थानका रूपमा प्रधानमन्त्रीले अगाडि सारेका हुन्।
प्रधानमन्त्री ओलीले यसअघि पनि ‘हाइ पर्फमेन्स सेन्टर’ र ‘स्पोर्ट्स साइन्स रिसर्च सेन्टर’ को उद्घाटन गर्दै खेल क्षेत्रमा दीर्घकालीन लगानीको प्रतिवद्धता जनाएका थिए। एनपीएललाई राष्ट्रिय गौरवको रूपमा लिँदै उनले यसलाई नरोकिने बताएपछि अब नयाँ रंगशाला निर्माणको घोषणा एक अर्को महत्त्वपूर्ण कडी बन्ने देखिन्छ।
यस पहल सफल भएमा काठमाडौं उपत्यकाले दशरथ रंगशालापछिको अर्को ठूलो र सुविधा सम्पन्न रंगशालाको रूपमा ‘जगाती रंगशाला’ पाउनेछ।
