प्रधानमन्त्री ओलीले चिनियाँ राष्ट्रपति सीसँग उठाए लिपुलेक मुद्दा

भदौ १५, २०८२।

काठमाडौँ – प्रधानमन्त्री केपी शर्मा ओलीले चिनियाँ राष्ट्रपति सी चिनफिङसँगको भेटमा लिपुलेकलाई व्यापारिक मार्ग बनाउने भारत–चीनबीचको सहमतिप्रति आपत्ति जनाएका छन्।

शनिबार चीनको तियानजिनमा भएको द्विपक्षीय भेटमा प्रधानमन्त्री ओलीले सन् १८१६ को सुगौली सन्धिअनुसार महाकाली नदीको मुहान पूर्वका सबै भूभाग नेपालको रहेको कुरा स्पष्ट पारेका छन्।

प्रधानमन्त्रीको सचिवालयद्वारा जारी वक्तव्यमा उल्लेख भएअनुसार ओलीले लिपुलेक नेपाली भूमि भएकाले यसबारे चीनले नेपाललाई सहयोग गर्ने अपेक्षा रहेको बताएका छन्।

राष्ट्रपति सीले नेपालको दाबीलाई मान्यता दिए पनि नेपाल–भारतबीचको सीमा विवादमा चीन कुनै पक्ष बन्न नचाहने स्पष्ट गरेका छन्। रास्ट्रपति सीले भने, सीमा विवाद तपाईँहरू दुई पक्षले समाधान गर्ने विषय हो, नेपालको दाबीमा हाम्रो तर्फबाट कुनै कमी हुँदैन।

भेटमा दुवै पक्षले आपसी सम्बन्ध, बीआरआई (Belt and Road Initiative) परियोजनाको कार्यान्वयन र व्यापारिक नाकाको सहजताबारे छलफल गरेका थिए। नेपाललाई शंघाई सहयोग संगठन (SCO) को सदस्य बनाउन सहयोग गर्ने विषयमा पनि चर्चा भएको छ।

यसअघि ३ भदौमा चीन र भारतले लिपुलेक पासमार्फत व्यापार सुरु गर्ने सहमति गरेका थिए जसलाई लिएर नेपालभित्र चर्को विरोध भएको छ। सोही विषयलाई प्रधानमन्त्री ओलीले चीनसँग बलियो ढंगले उठाएका हुन्।