प्रधानमन्त्रीको बैठकमा गृहमन्त्री अर्यालमाथि दलहरूको कडा आलोचना

काठमाडौँ, कार्तिक ४, २०८२।

जेन–जी आन्दोलनपछि गठन भएको अन्तरिम सरकारकी प्रधानमन्त्री सुशीला कार्कीले मंगलबार बालुवाटारमा प्रमुख राजनीतिक दलका नेताहरूसँग पहिलो औपचारिक बैठक गरेकी छन्।

बैठकमा गृहमन्त्री ओम अर्यालका अभिव्यक्ति र निर्णयहरूलाई लिएर दलहरूले तीव्र असन्तुष्टि व्यक्त गरेका छन्।

बैठकमा सहभागी दलका नेताहरूले गृहमन्त्री अर्यालले दिएको अभिव्यक्ति र सुरक्षा व्यवस्थाप्रति देखाएको दोहोरो मापदण्डप्रति असन्तुष्टि व्यक्त गरेका थिए।

एमालेका उपमहासचिव प्रदीप ज्ञवालीका अनुसार गृहमन्त्रीले “भागेका कैदी र लुटिएका हतियारलाई चुनावमा प्रयोग नगर्ने प्रतिबद्धता दलहरूले जनाउनुपर्छ” भन्ने अभिव्यक्तिले दलहरूबीच आक्रोश सिर्जना गरेको हो।

त्यस्तै केही दलका नेताहरूले गृहमन्त्रीले आफ्नो पदको मर्यादा विपरीत व्यवहार गरेको र केही नेताहरूको सुरक्षाकर्मी फिर्ता लिएको निर्णय गलत भएको टिप्पणी गरे।

बैठकमा सहभागी एकीकृत समाजवादीका नेता राजेन्द्र पाण्डेले भने गृहमन्त्रीका टिप्पणीले चुनावी वातावरणमा नकारात्मक असर पार्ने डर छ भन्दै उनले सावधानी अपनाउन आग्रह गरे।

प्रधानमन्त्री कार्कीले भने सरकारले र सुरक्षा निकायहरूले आगामी चुनावको वातावरण बनाउन अहोरात्र काम गरिरहेको बताउँदै दलहरूको सहयोगबिना निर्वाचन सफल नहुने स्पष्ट पारिन्।

जेन–जी आन्दोलन र राजनीतिक दबाब:

जेन–जी आन्दोलनले हालको राजनीतिक परिदृश्यलाई नयाँ दिशा दिएको छ। युवा पुस्ताले पारदर्शिता, न्याय र अवसरको माग गर्दै सडकमा आएको यो आन्दोलनपछि देशमा ठूलो राजनीतिक पुनर्संरचना भएको थियो।

त्यसकै प्रभावमा बनेको यो अन्तरिम सरकारले आगामी निर्वाचनमार्फत स्थायित्व ल्याउने वाचा गरेको छ। तर दलहरूबीचको विश्वास संकट र गृहमन्त्रीका विवादास्पद वक्तव्यहरूले सरकारको चुनौती बढाएको छ।

बैठकमा प्रधानमन्त्री कार्कीले भने भनिन्, जेन–जी आन्दोलनले देशलाई जागरूक बनाएको छ। अब सबै दलहरूले मिलेर निष्पक्ष र भयरहित निर्वाचन सम्पन्न गर्नुपर्छ।

उनले सुरक्षा निकायहरू र मन्त्रालयहरूलाई चुनावी तयारीमा केन्द्रीत रहन निर्देशन दिइन् र राजनीतिक सहकार्यबिना लक्ष्य पूरा नहुने बताइन्।

उनले भनिन् चुनावको वातावरण बनाउन सरकार प्रतिबद्ध छ तर सबै दलहरूको सहकार्य आवश्यक छ। बैठकमा राष्ट्रपति रामचन्द्र पौडेलको रोहबरमा भएका अघिल्ला छलफलका विषयहरू पनि समीक्षा गरिएको थियो।