असार २३, २०८२ काठमाडौं दैनिक संवाददाता
युरोपेली मुलुक पोर्चुगलको राजधानी लिस्बनमा ‘दोस्रो बुढासुब्बा कप’ फुटबल प्रतियोगिता आयोजना हुने भएको छ। नेपाली समुदायले फुटबलको माध्यमबाट आपसी एकता सहकार्य र खेल संस्कृति प्रवर्द्धन गर्ने हेतुले आयोजना गर्दै आएको उक्त प्रतियोगिताको दोस्रो संस्करण यहि जुलाई १३ तारिखदेखि सुरु हुँदैछ।
प्रतियोगिताको आयोजना धरान फुटबल क्लब (धरान एफसी) पोर्चुगल शाखाले गरिरहेको हो। यस प्रतियोगिताले युरोपमा रहेका नेपाली खेलाडीहरूलाई एउटै मैदानमा उभ्याउने मात्र नभई नेपालीपन, राष्ट्रिय पहिचान र खेलकुद संस्कृतिको समेत प्रवर्द्धन गरिरहेको आयोजक बताउँछन्।
बुढासुब्बा कप नाम सुन्नासाथ धेरैको ध्यान धरान र पूर्वी नेपालतिर जान्छ, जहाँको धार्मिक, सांस्कृतिक र खेलकुदको ऐतिहासिक पृष्ठभूमिलाई यसले बोकेको छ। यही भावना लिएर धरान एफसी पोर्चुगलले गत वर्ष पहिलोपटक प्रतियोगिता आयोजना गरेको थियो।
सकारात्मक प्रतिक्रिया, उत्साहजनक सहभागिता र नेपाली समुदायबीचको आपसी सम्बन्धलाई अझै प्रगाढ बनाउने उद्देश्यले दोस्रो संस्करण आयोजना गरिएको क्लबका संयोजक अरुण राई बताउँछन्।
यस पटक प्रतियोगितामा युरोपभरिका २० वटा नेपाली टिमहरू सहभागी हुने भएका छन्। आयोजक राईका अनुसार सहभागी टिमहरू पोर्चुगल बाहेक बेलायत, जर्मनी, स्पेन, फ्रान्स, नेदरल्याण्ड्स, स्वीडेन, फिनल्याण्ड, डेनमार्क लगायत युरोपका विभिन्न देशहरूमा रहेका नेपालीहरूको प्रतिनिधित्व गर्नेछन्।
प्रतियोगिता ‘सेभेन ए साइड’ फुटबल ढाँचामा हुनेछ। फुटबल मैदान सानो हुनेछ, तर प्रतिस्पर्धा चर्को हुने आयोजकको विश्वास छ।
युरोपस्थित नेपाली खेलकुदमा यो प्रतियोगिता सर्वाधिक धनराशि सहितको मानिएको छ।
विजेता टिमले ५,००० युरो (झण्डै ७ लाख ५० हजार रुपैयाँ) नगद पुरस्कारसहित मेडल, प्रमाणपत्र र उपाधि ट्रफी जित्नेछन्। उपविजेता टिमलाई २,५०० युरो, मेडल र प्रमाणपत्र प्रदान गरिनेछ। त्यस्तै, श्रेष्ठ गोलकिपर, उत्कृष्ट खेलाडी, सर्वाधिक गोलकर्ता लगायत विधागत पुरस्कारहरू पनि प्रदान गरिने आयोजकले जनाएको छ।
प्रतियोगिता पोर्चुगलको राजधानी लिस्बनस्थित भिटोरिया दी क्लबको खेल मैदानमा हुनेछ। मैदानको भौगोलिक अवस्थिति र पहुँचले गर्दा दर्शक र सहभागी दुवैका लागि सहज हुने अपेक्षा गरिएको छ।
धरान एफसीका संयोजक राई भन्छन् हामी खेलमार्फत आपसी सम्बन्ध बलियो बनाउने लक्ष्य लिएका छौं। फुटबल नेपालीहरूमा गहिरो भावनासँग जोडिएको छ, त्यसैले हामी युरोपभरिका नेपालीलाई एउटै मञ्चमा ल्याउन पाउँदा गौरव महसुस गरेका छौं।
युरोपमा रहेका नेपालीहरूको क्षमता देखाउने यो एउटा प्लेटफर्म हो, अवसर हो। धेरै नेपालीहरू अध्ययन, रोजगारी वा स्थायीत्वका लागि युरोप आएका छन्।
तीमध्ये फुटबलप्रेमीहरूको संख्या अत्यन्तै ठूलो छ।
नेपालमा रहेका स्थानीय प्रतियोगिता जस्तै बुढासुब्बा गोल्ड कप, खप्तड कप वा पोखरा गोल्ड कपजस्तै, यस्ता विदेशस्थित प्रतियोगिताले प्रवासी नेपालीबीचको आपसी सहयोग र भाइचारा अभिवृद्धि गर्छ। कार्यक्रमको माध्यमबाट समाजमा सकारात्मकता, सहकार्य, आत्मविश्वास र नेतृत्वको अभ्यास पनि हुन्छ।
हामी केवल फुटबलको आयोजना मात्रै गरिरहेका छैनौं।
हामी नेपाली समाजभित्रको ऊर्जा, उत्साह र विश्वास निर्माण गरिरहेका छौं।
‘दोस्रो बुढासुब्बा कप’ केवल फुटबल प्रतियोगिता होइन।
यसले नेपाली संस्कृति, एकता, समर्पण र पहिचानलाई पनि मञ्च दिएको छ। प्रतियोगितामा सहभागीहरू नेपाली पोशाक, झण्डा, संगीत र खानाका साथ उपस्थित हुनेछन्।
जसले विदेशी भूमिमा समेत नेपालीपनको महत्त्व झल्काउनेछ।
नेपालबाट हजारौं किलोमिटर टाढा भए पनि नेपाली समुदाय युरोपमा आफ्नो पहिचान र संस्कृति बिर्सिएको छैन भन्ने सन्देश ‘बुढासुब्बा कप’ले दिएको छ।
यो प्रतियोगिता केवल ट्रफी जित्ने प्रतिस्पर्धा होइन यो सम्बन्ध, संस्कृति र सम्भावनाको उत्सव हो।
धरान एफसी पोर्चुगलले सुरु गरेको यो अभियानले आउँदा दिनहरूमा युरोपेली नेपाली खेलकुद नेटवर्कलाई सशक्त बनाउने, खेलाडी उत्पादनमा भूमिका खेल्ने र अन्तर्राष्ट्रिय पहिचान बनाउन टेवा पुर्याउने विश्वास लिएको छ ।
