पूर्वराजाका नातिको जुम्ला भ्रमणमा बनाएको भ्लगले चलाएको राजनीतिक र सामाजिक बहस

साउन २०, २०८२।

जुम्ला – पूर्वराजा ज्ञानेन्द्र शाहका नाति हृदयेन्द्र शाहको कर्णालीको जुम्ला जिल्ला भ्रमणका क्रममा तयार पारिएको १५ मिनेट लामो भ्लग भिडियो अहिले सामाजिक सञ्जालदेखि सञ्चारमाध्यमसम्ममा व्यापक रूपमा चर्चाको विषय बनेको छ।

सामान्यतया सार्वजनिक जीवनबाट टाढा रहने हृदयेन्द्रको पहिलोपटकको खुला प्रस्तुति र सहज व्यवहारले धेरैलाई आकर्षित गरेको छ भने अर्कातर्फ यसलाई नियोजित राजनीतिक प्रयासका रूपमा हेर्न थालिएको छ।

हृदयेन्द्रको यो भ्रमण जेठ महिनामा भएको थियो र उनको जन्मदिन पारेर सार्वजनिक गरिएको थियो। भिडिओ साझा कथा युट्युब च्यानल तथा फेसबुक पेजमा राखिएको छ। भिडिओको सुरुआतमा हृदयेन्द्रले अंग्रेजीमा बोल्दै भन्छन्, आज म कर्णालीको जुम्ला आएको छु। नेपालमा अन्वेषण गरिनुपर्ने धेरै ठाउँमध्ये यो पनि एक हो।

उक्त भिडिओमा उनले तिला खोलामा बसेर स्थानको सुन्दरताको वर्णन गरेका छन्, स्थानीयहरूसँग भेटघाट गरेका छन् र कर्णाली स्वास्थ्य विज्ञान प्रतिष्ठानका एक विद्यार्थीले राखेको प्रश्नको सरल उत्तर दिएका छन्।

जब सोधिन्छ, नेपाल कहिले समृद्ध हुन्छ? हृदयेन्द्रको जवाफ थियो, मान्छेहरूले राम्रो काम गरे भने सबै कुरा राम्रोसँग चल्यो भने त हुन्छ होला। अलिकति हामी पनि लाग्नु पर्‍यो, अलिकति आँट गर्नुपर्‍यो।

भिडिओ हृदयेन्द्रकी आमा हिमानी शाहद्वारा सञ्चालित ‘हिमानी ट्रस्ट’ ले जुम्लामा बनाउँदै गरेको सुत्केरी स्याहार केन्द्र शिलान्यास कार्यक्रममा खिचिएको हो।

हृदयेन्द्रको यो भिडियो सामाजिक सञ्जालमा राप्रपाका नेताहरूदेखि पूर्वराजतन्त्र समर्थकहरूमाझ उत्साहपूर्वक स्वागत गरिएको छ। धेरैले उनलाई ‘भविष्यका राजा’ भनेर ब्याख्या गर्न थालेका छन्। राप्रपाका अध्यक्ष राजेन्द्र लिङ्देन लगायत धेरै नेताहरूले यो भिडिओ शेयर गरेका छन्।

तर सबैले सकारात्मक रूपमा भने हेरेका छैनन्। माओवादी सांसद छिरिङ ल्हामु लामाले फेसबुकमा लेख्दै भिडिओ भन्दा पहिला जुम्लालाई धेरै अरूले चिनाएको बताइन्। उनले भनिन्, गणतान्त्रिक नेपालमा बेलाबेला राजतन्त्रकालको झल्को दिने गतिविधिले हामीलाई सोच्न बाध्य बनाउँछ।

त्यस्तै स्वतन्त्र सांसद विनीता कठायतले सामाजिक सञ्जालमा लेखिन्, नाति पुस्तासँग डराउनेहरूले जुम्लाको प्रवर्द्धनका लागि पनाति पुस्ताले बनाएको एउटा भ्लगसँग पक्कै डराउने छन्।

राजसंस्थाका सन्दर्भमा राजनीतिक टिप्पणी गर्दै विश्लेषक युवराज घिमिरे भन्छन्, उनका हजुरबुबा महेन्द्रले पनि राजपरिवारका सदस्यलाई नेपाल बुझ्न देश घुम्न पठाउँथे। हृदयेन्द्र पनि त्यही परम्पराको अभ्यास गरिरहेका देखिन्छन्। उनले थपे, उनी सामान्य व्यवहार देखाएर चर्चामा आएका हुन्, तर त्यो भिडिओलाई राजनैतिक प्रयोगका लागि उपयोग गर्ने प्रयासहरू पनि देखिन्छ।

त्रिभुवन विश्वविद्यालयका उप–प्राध्यापक वाईपी आचार्य भन्छन्, हृदयेन्द्रको भ्लग चर्चाको केन्द्रमा आउनु उनको पारिवारिक विरासतकै कारण हो। उनलाई समाजले सामान्य नागरिकभन्दा अलिक फरक रूपमा हेरेका छन् ।

विश्लेषकहरूको बुझाइमा हृदयेन्द्रको भ्लग एउटा सामान्य भ्रमण मात्र होइन, भविष्यका सम्भावित राजनैतिक संकेतहरूको परीक्षण पनि हुन सक्छ। आचार्य भन्छन्, सामाजिक सञ्जालमा देखिएको लोकप्रियतालाई प्रयोग गर्दै राजावादी शक्तिहरू उनलाई अगाडि सार्न सक्छन्।