नेपालद्वारा भारत ९२ रनले पराजित, हङकङ सिक्सेसमा पहिलो जित

कार्तिक २२, २०८२। उपसना पौडेल

काठमाडौं – हङकङमा जारी हङकङ इन्टरनेशनल सिक्सेस क्रिकेट प्रतियोगिता अन्तर्गत नेपालले भारतलाई ९२ रनले पराजित गर्दै पहिलो जित हासिल गरेको छ।

नेपालले दिएको १३८ रनको विशाल लक्ष्य पछ्याउने क्रममा भारत तीन ओभरमै अलआउट हुँदै ४५ रनमा समेटिएको थियो। भारतका भरत चिप्ली र प्रियांक पञ्चालले समान १२–१२ रन बनाए भने रोविन उथप्पा पाँच तथा दिनेश कार्तिक र सहबाज नदिमले सात–सात रन जोडेका थिए ।

नेपालका लागि रसिद खानले उत्कृष्ट प्रदर्शन गर्दै तीन विकेट लिएका थिए। त्यस्तै रुपेश सिंह र बसिर अहमदले समान दुई–दुई विकेट हात पारे।

यसअघि ब्याटिङ गरेको नेपालले निर्धारित छ ओभरमा कुनै पनि विकेट नगुमाई १३७ रन बनाएको थियो। रसिद खानले ५५ रनको धमाकेदार योगदान दिए भने सन्दीप जोराले ४७ र लोकश बमले ३१ रन जोड्न सफल भए।

जारी प्रतियोगितामा यो नेपालको पहिलो जित हो। यसअघि समूह चरणमा नेपाल दक्षिण अफ्रिका र श्रीलङ्कासँग पराजित भएको थियो भने हिजो अफगानिस्तानसँग पनि हार बेहोरेको थियो।