कार्तिक २३, २०८२। राज नेपाली
नेपाली महिला क्रिकेटकी उपकप्तान पूजा महतो फेरि ‘फेस अफ द बोल्ट्स’

काठमाडौं – नेपाली महिला क्रिकेट टिमकी उपकप्तान पूजा महतोलाई नेपाल प्रिमियर लिग (एनपीएल) टोली जनकपुर बोल्ट्सले फेरि पनि ‘फेस अफ द बोल्ट्स’का रूपमा निरन्तरता दिएको छ।
आइतबार काठमाडौंमा आयोजित एक विशेष कार्यक्रममा जनकपुर बोल्ट्सले पूजालाई दोस्रो संस्करणका लागि पुनः ‘फेस अफ द बोल्ट्स’को रूपमा घोषणा गरेको हो। उक्त अवसरमा टोलीको नयाँ जर्सी पनि सार्वजनिक गरिएको थियो।
कार्यक्रममा बोल्दै पूजाले भनिन्, जनकपुर बोल्ट्सको सम्पूर्ण टिमलाई मलाई फेरि फेस अफ बोल्ट्स बनाएकोमा धन्यवाद। म यस सहकार्यमा निकै खुशी छु। अघिल्लो पटक टिम च्याम्पियन बनेको थियो, यो पटक पनि त्यसै सफलता दोहोरियोस् भन्ने चाहना छ।
कार्यक्रममा जनकपुर बोल्ट्सका जनरल म्यानेजर निरोज खतिवडा, नेपाल लुब ओयल लिमिटेडका एमडी करण चौधरी र पूजाले संयुक्त रूपमा नयाँ जर्सी सार्वजनिक गरे।
जनकपुर बोल्ट्सले यसअघि विदेशी खेलाडीका रूपमा लाहिरु मिलान्थालाई निरन्तरता दिइसकेको छ भने दक्षिण अफ्रिकाका वायन पार्नेल र इमरान ताहिरलाई अनुबन्ध गरेको छ। टोलीका मुख्य प्रशिक्षकमा वेस्ट इन्डिजका दिग्गज क्रिकेटर शिवनराइन चन्द्रपल रहेका छन्।
जनकपुर बोल्ट्सले पहिलो संस्करणमै उत्कृष्ट प्रदर्शन गर्दै टिमको पहिचान बलियो बनाएको थियो। यसपटक पनि बोल्ट्सले देश-विदेशका उत्कृष्ट खेलाडीहरूसँग मिलेर उपाधिको लक्ष्य राखेको जनाइएको छ।










