गभर्नर पौडेल: हामीसँग पैसा र स्रोत छ, अब चाहिएको मनोबल मात्र हो

कार्तिक २३, २०८२। उपसना पौडेल

हामीसँग पैसा र स्रोत छ, अब चाहिएको मनोबल मात्र हो” गभर्नर पौडेल

काठमाडौं – नेपाल राष्ट्र बैंकका गभर्नर डा. विश्वनाथ पौडेलले देशको अर्थतन्त्रलाई उकास्न अब ‘मनोबल’ नै निर्णायक तत्व बन्ने बताएका छन्।

राष्ट्रिय आर्थिक बहस २.० कार्यक्रममा सम्बोधन गर्दै गभर्नर पौडेलले भने, अर्थतन्त्र आत्मविश्वासमा निर्भर हुन्छ, विश्वास गरेमा मात्र उकासिन्छ। हामीसँग पैसा छ, स्रोत छ, सुशासन पनि छ, अब चाहिएको कुरा मनोबल हो।

पौडेलका अनुसार देशमा आर्थिक सूचकले मात्रै होइन, नागरिकको मनोबलले पनि आर्थिक गति निर्धारण गर्छ। हामीसँग वित्तीय क्षमता छ, तर मनोबल र लगानीको हिम्मत जगाउन सक्यौं भने अर्थतन्त्र पुनः गतिमा आउँछ उनले थपे।

गभर्नर पौडेलले सार्वजनिक खर्च र निजी लगानीलाई अर्थतन्त्रको मुख्य इन्धनका रूपमा व्याख्या गर्दै भने, अमेरिकाले महामन्दीपछि खर्च बढाएर अर्थतन्त्र उठायो, नेपालले पनि त्यही बाटो लिनुपर्ने हो।

उनले हालको आर्थिक संकटमा कालोसूचीमा परेका करिब डेढ लाख ऋणी र ‘एभरग्रिनिङ’ ऋणको समस्याले नयाँ उद्योग, व्यवसाय र स्टार्टअपहरू प्रभावित पारेको बताए। अक्षम उद्योगलाई स्वाभाविक रूपमा बाहिरिन दिनुपर्छ र नयाँ सोचलाई ठाउँ दिनुपर्छ उनले जोड दिए।

त्यसैगरी विश्वव्यापी डिजिटल रूपान्तरणको सन्दर्भमा गभर्नरले बैंकिङ, व्यापार र प्रशासनिक प्रणालीमा नयाँ प्रविधि अपनाउनुपर्नेमा जोड दिए। परिवर्तनसँग तालमेल गर्न नसक्ने संस्था ब्लकबस्टरजस्तै इतिहास बन्नेछन्, उनले उदाहरण दिँदै भने।

कार्यक्रमको अन्त्यमा उनले सरकारलाई खर्च बढाउन र निजी क्षेत्रलाई तीव्र गतिमा अघि बढ्न आग्रह गर्दै भने, जब सरकार र निजी क्षेत्र सँगसँगै अगाडि बढ्छन्, त्यतिबेला मात्र अर्थतन्त्रमा आत्मविश्वास फर्किन्छ।