एमाले महाधिवेशनमा "मिसन ८४" सार्वजनिक गर्दै ओली

साउन २२, २०८२।

काठमाडौँ – नेकपा एमालेका अध्यक्ष केपी शर्मा ओलीले आगामी २०८४ को आम निर्वाचनलाई लक्षित गर्दै ‘मिसन ०८४’ नामक राजनीतिक प्रतिवेदन विधान महाधिवेशनमा प्रस्तुत गर्ने भएका छन्। आगामी भदौ २०–२२ मा हुने महाधिवेशनका लागि ओलीले पार्टीलाई देशको ‘राष्ट्रिय निर्णायक शक्ति’ बनाउने अभिष्टका साथ प्रतिवेदन तयार पार्दैछन्।

ओली नेतृत्वको टोलीमा महासचिव, उपमहासचिवसहितका नेताहरू प्रतिवेदन लेखनमा संलग्न छन्। राजनीतिक प्रतिवेदनमा ‘सुखी नेपाली, समृद्ध नेपाल’ को अवधारणा, वर्तमान राष्ट्रिय र अन्तर्राष्ट्रिय परिस्थिति, गठबन्धन सरकारको समीक्षा, तथा विपक्षी दलहरूप्रति आलोचनात्मक विश्लेषण समावेश गरिने एमाले स्रोतको भनाइ छ।

अध्यक्ष ओलीले कुनै दलसँग गठबन्धन नगरी २०८४ को निर्वाचनमा एक्लै प्रतिस्पर्धा गर्ने र मुलुकको पहिलो शक्ति बन्ने दाबी गर्दै आएका छन्। माओवादी केन्द्रले वाम एकता प्रयास गरिरहे पनि एमाले भने कांग्रेसलाई मुख्य प्रतिस्पर्धी मान्दै गठबन्धनविनाको चुनावी तयारीमा जुटेको देखिएको छ।

महासचिव शंकर पोखरेलले सांगठनिक प्रतिवेदन तयार गर्दैछन् भने सदस्यता संरचना पुनर्संरचना गरी ‘संगठित’ र ‘साधारण’ सदस्य छुट्याउने विधान मस्यौदा केन्द्रीय समितिले पारित गरिसकेको छ। एमालेले हाल ६ लाख संगठित सदस्य भएको दाबी गरेको छ।

एमाले महाधिवेशन, केपी ओली, मिशन ०८४, राजनीतिक प्रतिवेदन, एमाले निर्वाचन रणनीति, एमाले सदस्यता, गठबन्धन विरोध, एमाले कांग्रेस प्रतिस्पर्धा, विधान मस्यौदा, UML Mission 084 — बिहीबार महाधिवेशनस्थल अवलोकनका लागि गएका एमालेका वरिष्ठ उपाध्यक्ष ईश्वर पोखरेलसहितको टोली ।

विधान महाधिवेशनमा देशभरबाट २,०७७ जना प्रतिनिधिको सहभागिता रहनेछ। पूर्वका उपाध्यक्ष विष्णु पौडेलको संयोजकत्वमा तयार भएको विधान मस्यौदा सुझावका लागि प्रदेश र जिल्ला कमिटीहरूमा पठाइएको छ। प्रतिनिधिहरूले कुनै शुल्क तिर्न नपर्ने र पार्टीले आवासको व्यवस्था नगर्ने निर्णय गरिएको छ।

प्रचार विभाग प्रमुख राजेन्द्र गौतमका अनुसार महाधिवेशन तयारी तीव्र गतिमा भइरहेको छ। राजनीतिक, सांगठनिक, अनुशासन, लेखापरीक्षण, निर्वाचन आयोग, सल्लाहकार समितिका प्रतिवेदन छुट्टाछुट्टै नेताहरूले प्रस्तुत गर्नेछन्।

आपतकालीन व्यवस्थापनका लागि लालबाबु पण्डितको संयोजकत्वमा समिति बनेको छ भने खाद्य तथा सचिवालय व्यवस्थापन, प्रचार प्रसार, स्वास्थ्य सेवा, स्वयंसेवक परिचालन, झाँकी निर्माण जस्ता पक्षको जिम्मा विभिन्न नेताहरूलाई दिइएको छ।

एमालेले विधान महाधिवेशनलाई आगामी निर्वाचनको रणनीतिक थालनीका रूपमा उपयोग गर्न खोजेको स्पष्ट देखिएको छ ।